Kuri iki Cyumweru, tariki ya 5 Ukwakira 2025, mu mujyi wa Kigali habaye Sporo Rusange (Car Free Day) yitabiriwe n’abaturage benshi baturutse mu bice bitandukanye by’umujyi. Ni gahunda yabereye mu mwuka w’ibyishimo, ubusabane n’ubuzima buzira umuze, aho imihanda ya Kigali yongeye kuba iy’abanyamaguru n’abakora siporo zitandukanye.
Iyi sporo rusange y’uyu munsi yibanze cyane ku mukino w’amagare, mu rwego rwo gukomeza kwizihiza no kwibuka uko u Rwanda rwakiriye neza Shampiyona y’Isi y’Amagare (UCI Road World Championships) yabereye mu gihugu vuba aha. Abitabiriye kandi bakoze siporo zitandukanye zirimo gusiganwa ku magare, imbyino za Kinyarwanda, aerobics, gusiganwa n’amaguru, n’imyitozo yo mu rwego rwa gym.
Uretse ibikorwa bya siporo, abaturage bitabiriye banapimwe indwara zitandukanye zitandura, zirimo umuvuduko w’amaraso, indwara z’amenyo, amaso, umunaniro ukabije, n’izindi, mu rwego rwo gukangurira abantu kwita ku buzima bwabo hakiri kare.
Umuvugizi w’Umujyi wa Kigali, Emma Claudine, ubwo yagiranaga ikiganiro n’umunyamakuru w’ikinyamakuru Mavete.com, yasobanuye ko gukora siporo ari ingenzi cyane mu buzima bwa buri wese. Yagize ati: “Siporo ni ubuzima. Ni yo mpamvu duhora dushishikariza buri Munyakigali kuyigira umuco. Twishimira ko uyu munsi abitabiriye ari benshi, ariko n’abataritabira nabo barasabwa kuzaza ubutaha, kuko Kigali yubakiye ku buzima, isuku n’ubumwe.”
Emma yongeye gushimira abitabiriye bose, abashimira uko bagaragaje isura y’umujyi mwiza, yongeraho ko iyi gahunda igamije no gukomeza guteza imbere ibikorwa byo kubungabunga ibidukikije binyuze mu gikorwa cyo gutera no kurinda ibiti.
Iyi Car Free Day y’iki cyumweru yasize ishimangiye ko siporo ari isoko y’ubuzima n’ubumwe bw’Abanyakigali, ndetse ko Kigali ikomeje kuba umujyi w’ibyishimo, isuku n’imbaraga z’abawutuye.
