Udukingirizo ni kimwe mu bikoresho by’ingenzi mu kurwanya indwara zandurira mu mibonano mpuzabitsina no gukumira inda zitateguwe. Ku isi hose, udukingirizo dukomeje gufatwa nk’imbarutso y’ubuzima rusange no guteza imbere iterambere ry’imiryango. Agakingirizo ka mbere kakoreshejwe mu kinyejana cya 16 mu Butaliyani, gakorwa mu ruhu rw’amatungo, mu 1920 havumburwa agakingirizo ka latex gakoreshwa kugera magingo aya. Mu Rwanda, twinjiye cyane mu myaka ya 1980 mu rwego rwo guhangana n’ubwandu bwa virusi itera SIDA bwari butangiye kwiyongera.
Nk’uko ubushakashatsi bwa Rwanda Demographic and Health Survey (RDHS 2019/2020) bubigaragaza, abagore bafite imyaka 16-40 bakoze imibonano mu gihe giheruka, 10.8% gusa nibo bavuze ko bakoreshaga agakingirizo mu gihe cya nyuma. Mu bagore bakora umwuga w’uburaya mu mujyi wa Kigali, 68.9% bavuze ko bakoresha agakingirizo buri gihe, naho 77.4% bavuga ko imibonano ya nyuma bayikoreyaho. Mu rubyiruko rw’imyaka 14-20 mu mijyi itifite serivisi zihamye z’ubuzima bw’imyororokere, gukoresha agakingirizo bigaragara ku kigero cya 3.7% gusa. Ibi byerekana ko hari icyuho kinini hagati y’ubumenyi abantu bafite ku kamaro k’agakingirizo n’imikoreshereze yabyo mu buzima bwa buri munsi.
Ibihugu bigaragara ko bikoresha cyane udukingirizo birimo Afurika y’Epfo, Tailand, u Buholandi, u Bufaransa n’u Budage. Ibihugu kandi bigaragara ko bidakoresha cyane udukingirizo harimo Nigeria, Malawi, Burundi, Sudani y’Epfo na Afuganistani. Aha higaragaza uko imyumvire, gahunda za Leta, n’imiterere y’imibereho bishobora kugira uruhare rukomeye mu gukoresha cyane cyangwa kudakoresha nagato cyangwa gake agakingirizo.
Ingaruka zo gukoresha agakingirizo zo ni nyinshi, imbi n’inziza,reka duhere kungaruka nziza zikoreshwa ry’udukingirizo zirimo kurinda indwara zandurira mu mibonano mpuzabitsina, inda zitateguwe zirakumirwa, kwizera umutekano mu mibonano mpuzabitsina ndetse no gufasha mu igenamuryango. Ariko hari n’ingaruka mbi zishobora kugaragara mu gihe gakoreshwa cyane cyangwa nabi, zirimo allergie ku ruhu, uduheri, ndetse no gufata udukingirizo nk’uburyo bwonyine bwo kwirinda bikaba byatuma abantu birara ntibite ku zindi ngamba z’ubuzima.
Nubwo u Rwanda rufite intambwe rwateye mu gukangurira abaturage gukoresha agakingirizo, imibare igaragaza ko rugifite urugendo rurerure kugira ngo imikoreshereze ibe ku rwego rwo hejuru nk’uko bigaragara mu bindi bihugu. Kongera ubukangurambaga, gushaka uburyo bwo guha urubyiruko udukingirizo mu buryo butateza ipfunwe no guca imyumvire y’umuco igitsikamira ikoreshwa ryabyo, nibyo bizafasha u Rwanda kugera ku rwego rwo hejuru mu kurinda ubuzima bw’abaturage barwo.
