Ishyirahamwe ry’umupira w’amaguru mu Rwanda (FERWAFA) ryashyize ahagaragara urutonde rw’abakinnyi 23 bagize Ikipe y’Igihugu y’Abakobwa batarengeje imyaka 20 (Amavubi U-20), bazakina na Nigeria mu mikino yo gushaka itike y’Igikombe cy’Isi cy’Abatarengeje imyaka 20 mu bakobwa kizaba mu 2026.
Umutoza mukuru André Cassa Mbungo ni we uyoboye uru rugendo, aho yahamagaye abakinnyi baturutse mu makipe atandukanye y’imbere mu gihugu, ndetse hakabonekamo n’abakinnyi bakina hanze, barimo Ikuze Mutesayire wo muri PSG Academy (u Bufaransa) na Bateta Challon ukina muri Isonga.
Abazamu barimo Uwamahoro Rosine na Maombi Joana (APR WFC), ndetse na Iramuzi Belise (Mutunda WFC).
Ba myugariro bashyizwe imbere harimo Ndayizeye Chance, Irihwe Regine na Uwase Bonnette (APR WFC), Mushikiwabo N. Honette (Gatsibo WFC), Muhawenimana Claire (Macuba WFC), Umutoni Rehema (Nyagatare WFC), ndetse na Niyubahwe Amina (APARE WFC).
Abo hagati barimo Bateta Challon (Isonga), Ikuze Mutesayire (PSG Academy), Uwase Fatina na Mutoni Jeannette (APR WFC), Gikunziro Scholastique (Rayon Sport WFC), Rwemera Keilia (APR WFC), hamwe na Dukundane Elvine (Mutunda WFC).
Ba rutahizamu bahamagawe barimo Ishimwe Darleine (Forever WFC), Gisubizo Claudette, Abimana Laurence na Uwingeneye Grace (APR WFC), hamwe na Mutuyimana Sandrine (Inyemera WFC).
Amavubi azabanza kwakira Nigeria ku wa 21 Nzeri 2025 kuri Kigali Pele Stadium guhera saa 15:00, mbere yo gusubira i Lagos ku wa 27 Nzeri 2025 mu mukino wo kwishyura uzabera kuri Lekan Salami Stadium.
Uyu mwiherero uteganyijwe uzafasha abakobwa b’u Rwanda kongera imbaraga no gukarishya ubumenyi, mu gihe intego ari uguhagararira igihugu neza no kwerekeza mu Gikombe cy’Isi. Abakunzi b’umupira w’amaguru barasabwa gushyigikira bikomeye iyi kipe, kugira ngo igere ku ntsinzi imbere y’ikipe y’igihugu ya Nigeria izwiho ubukomeye.
