Abakinnyi b’Ikipe y’Igihugu y’u Rwanda, Amavubi, bakina imbere mu gihugu, bamaze kugera mu mwiherero uri kubera muri hoteli nshya ya FERWAFA, aho bagiye kwitegura imikino iteganyijwe mu minsi iri imbere. Uyu mwiherero watangiye kuri uyu wa Gatatu, tariki ya 12 Ugushyingo 2025, ukazasozwa ku Cyumweru, tariki ya 16 Ugushyingo 2025.
Ni umwiherero wateguwe na Ishyirahamwe ry’Umupira w’Amaguru mu Rwanda (FERWAFA) ku bufatanye n’Umutoza Mukuru w’Amavubi, Adela Amrouche, ati hagamijwe kureba urwego rw’abakinnyi bakina mu gihugu no kubategura neza mbere y’imikino y’amajonjora y’igikombe cy’Isi n’amarushanwa yo muri Afurika cyane ko mu majonjora yigikombe cy’isi bavuyemo kera nakare.
Amakuru ava muri FERWAFA avuga ko uyu mwiherero ugamije gufasha abakinnyi gukomeza umurego, kongera ubufatanye hagati yabo, no gutuma umutoza akurikirana uburyo bashobora guhangana ku rwego mpuzamahanga.
Abakinnyi 24 nibo bahamagawe muri uyu mwiherero, barimo abahagarariye amakipe akomeye ya shampiyona y’u Rwanda nka APR FC, Rayon Sports, Police FC n’izindi. Abatoza bavuga ko bazita cyane ku kongerera imbaraga urwego rw’imikinire, ubufatanye mu kibuga ndetse no gusuzuma uburyo bwa tekinike n’ubwirinzi.
Hoteli nshya ya FERWAFA, aho uyu mwiherero urimo kubera, ni kimwe mu bikorwa remezo bishya by’iri shyirahamwe, byubatswe hagamijwe gufasha mu bikorwa byo gutegura amakipe y’igihugu n’andi makipe y’imyitozo.
Uyu mwiherero witezweho gutanga ishusho y’abakinnyi bazitabazwa mu mikino iteganyijwe muri Nzeri 2026, ndetse no gukomeza kubaka ikipe ihamye ishobora guhagararira u Rwanda mu marushanwa akomeye y’Afurika n’Isi.
