Minisitiri w’Ububanyi n’Amahanga n’Ubutwererane, Ambasaderi Dr.Olivier Nduhungirehe, yatangaje ko u Rwanda rutazongera kwihanganira kwemerera guha inzira abacanshuro boherezwa gufasha Repubulika Iharanira Demokarasi ya Congo (RDC) mu ntambara ikomeje hagati y’ingabo zayo n’umutwe wa M23.
Ibi yabivuze mu gihe hakomeje kuvugwa ko ubutegetsi bwa Kinshasa bukomeje gukoresha abacanshuro baturuka mu bindi bihugu, ariko iyo batsinzwe bagasaba ko banyuzwa ku butaka bw’u Rwanda kugira ngo bave mu mirwano. Minisitiri Nduhungirehe yavuze ko iki gikorwa kidakwiye na gato, kuko kinyuranya n’amategeko mpuzamahanga ndetse kikaba ari uburyo bwo guharabika u Rwanda no kugushyira mu bibazo bitari ibyacyo.
“U Rwanda ntabwo ari inzira yo kugemurirwamo no gucyura abacanshuro. Ntabwo tugomba kugaragara nk’igihugu kibaha ubuhungiro igihe batsinzwe. Nta rwego na rumwe rwemewe rwakwemera kubigira inshingano,” niko yavuze.
Aya magambo aje mu gihe impaka no kutumvikana hagati ya Kigali na Kinshasa zikomeje kwiyongera, cyane cyane ku birebana n’uruhare rwa M23 mu burasirazuba bwa Congo. Kinshasa ishinja Kigali gufasha uyu mutwe, mu gihe u Rwanda rwo ruvuga ko icyo gihugu cyanze gukemura ibibazo by’Abanye-Congo b’Abatutsi nimugihe congo yo ivuga ko ari abanyarwanda ibi byabaye intandaro y’aya makimbirane.
Icyakora, u Rwanda rwongeye gushimangira ko rwiyemeje gukorana n’imiryango mpuzamahanga mu gushakira umuti urambye ikibazo cy’umutekano mu karere, ariko rutazemera gushorwa mu bikorwa byerekana ko rugomba gufata umusaruro w’intambara itari yaruteguye.
Ubusanzwe, ibihugu bikunze gusaba inzira byifashisha imikoranire n’imiryango mpuzamahanga nka MONUSCO cyangwa Afurika yunze Ubumwe. Ariko, nk’uko u Rwanda rubivuga, ni inshuro nyinshi rwagiye rusabwa ko inzira z’abacanshuro banyuzwa ku butaka bwarwo, ibintu Ambasaderi Nduhungirehe avuga ko bidashobora gukomeza.
Uyu mwanzuro w’u Rwanda urashimangira icyifuzo cy’uko RDC ifata inshingano zayo mu gukemura ibibazo by’umutekano w’imbere, aho kugerageza kubyorohereza binyuze mu gutera imbogamizi ku baturanyi.
