Umuvugizi wa Polisi y’u Rwanda, ACP Boniface Rutikanga, yemeje amakuru y’uko abahanzi babiri bakunzwe mu Rwanda, Barbara Horn Teta wamamaye nka cndetse na Ariel Wayz, batawe muri yombi. Amakuru y’itabwa muri yombi ry’aba bahanzi yemejwe nyuma akwirakwira kumbuga nkoranyambaga.
Aba bahanzi bombi bafashwe nyuma yo kurenza amasaha yagenwe yo kuguma mu kabari. Nyuma yo gupimwa n’inzego z’umutekano, basanzwe bakoresha ibiyobyabwenge, bituma bahita bafatwa kugira ngo bakurikiranwe n’amategeko. Kuri ubu bacumbikiwe kuri sitasiyo ya Polisi i Remera mu Mujyi wa Kigali, aho iperereza rikomeje kugira ngo hamenyekane amakuru yose ajyanye n’iki kibazo cy’ikoresha ry’ibiyobyabwenge.
Iyi nkuru yakwirakwiye cyane ku mbuga nkoranyambaga, ahagaragaye impaka nyinshi hagati y’abakunzi b’umuziki nyarwanda n’abasesenguzi. Bamwe bagaragaje agahinda n’ibyishimo bike, bavuga ko aba bahanzi bari bakwiye kuba icyitegererezo ku rubyiruko aho kwivanga mu bikorwa bihungabanya imibereho. Umwe mu rubyiruko twaganiriye witwa Gilbert yagize ati: “Aba bahanzi barakunzwe cyane n’urubyiruko. ntibakabaye mu bikorwa bitemewe n’amategeko bituma ababakurikira bumva ko nta kibazo, kandi ibyo bishobora kubacanga.
Hari abandi ariko bagaragaza ko kuba bafashwe bishobora kuba isomo rikomeye ku bandi bahanzi n’abakoresha ibiyobyabwenge muri rusange. Jean Claude, umusesenguzi mu by’imyidagaduro, yavuze ati: “Ibi bikorwa byibutsa ko abahanzi, n’ubwo ari ibyamamare, bakwiye gushyira imbere indangagaciro nziza. Kuba Polisi yarabafashe kandi ikabashyira mu maboko y’amategeko, ni intambwe ikomeye mu kurwanya ikoreshwa ry’ibiyobyabwenge mu myidagaduro.”
Polisi y’u Rwanda isaba buri wese kwirinda ibiyobyabwenge, ikibutsa ko bifatwa nk’ikibazo gikomeye gishobora guteza ingorane mu buzima bw’abantu no gusubiza inyuma iterambere ry’igihugu. Mu butumwa bwe, ACP Rutikanga yasabye abaturage, by’umwihariko urubyiruko, kwirinda ibikorwa byose bishobora kubashyira mu kaga, ahubwo bagaharanira kubaka ejo hazaza heza binyuze mu bikorwa byiza kandi bifitiye igihugu akamaro.
Ibi bibaye mu gihe imyidagaduro nyarwanda ikomeje kwaguka no kugera ku rwego mpuzamahanga. Abasesenguzi bavuga ko ibyabaye kuri Ariel Wayz na Babo bikwiye gutanga isomo rikomeye ku bandi bahanzi n’urubyiruko muri rusange, kugira ngo bibafashe gusobanukirwa ko kuba icyitegererezo bisaba imyitwarire iboneye kandi itarimo amakosa.
