Perezida wa Repubulika y’u Rwanda, Paul Kagame, uri mu ruzinduko rw’akazi i Baku muri Azerbaijan, ku m kuruyu wa Gatandatu tariki ya 20 Nzeri 2025, yasuye Urwibutso rwa Alley of Honor, rumenyerewe nk’ahakomeye mu mateka y’iki gihugu.
Muri urwo ruzinduko, Perezida Kagame yunamiye Heydar Aliyev, wabaye Perezida wa gatatu wa Azerbaijan, ndetse n’umugore we Zarifa Aliyeva, umushakashatsi n’inzobere mu by’ubuvuzi. Heydar Aliyev ni umwe mu bayobozi b’ingenzi babashije kuyobora igihugu muri gahunda z’ivugurura nyuma y’uko kibonye ubwigenge, akaba asigaranye amateka akomeye mu rugendo rwo kubaka Azerbaijan y’iki gihe.
Perezida Kagame yashyize kandi indabo ku rwibutso rw’intwari z’Azerbaijan zaharaniye intsinzi n’ubusugire bw’igihugu cyabo. Aho hantu hafatwa nk’ikirango cy’ubwitange n’ubutwari by’abenegihugu bagiye batanga ubuzima bwabo mu rugamba rwo guhesha igihugu cyabo ubwigenge n’icyubahiro mu ruhando rw’amahanga.
Uruzinduko rwa Perezida Kagame muri Azerbaijan rubaye mu gihe ibihugu byombi bimaze igihe bigirana umubano ugaragazwa n’ubufatanye mu nzego zitandukanye, zirimo ubukungu, ikoranabuhanga, n’ubucuruzi. Uyu mubano ukomeje kwiyongera ndetse ukanashimangirwa n’ubusabane hagati y’abayobozi bakuru.
Uretse uru ruzinduko ku rwibutso, Perezida Kagame azitabira ibiganiro n’abayobozi bakuru b’iki gihugu, bigamije gushimangira ubufatanye hagati y’u Rwanda na Azerbaijan mu byerekeye iterambere rirambye, kongera ubuhahirane, no gusangira ubunararibonye mu nzego zinyuranye.
Kuba Perezida Kagame yunamiye intwari z’iki gihugu, ni igikorwa gifite ubusobanuro bukomeye mu kubaka urwego rwo kubahana, kwibuka amateka no kwerekana ko ubufatanye hagati y’ibihugu bushingira ku mateka, indangagaciro n’ubutwari.
Uruzinduko rwe rukaba rutegerejweho gukomeza guha imbaraga umubano w’u Rwanda na Azerbaijan, mu gihe ibihugu byombi bigaragariza ubushake bwo gukorana mu rwego mpuzamahanga no guteza imbere inyungu z’abaturage babyo.
