Kuva ku wa 9 kugeza ku wa 11 Nzeri 2025, Minisitiri w’Uburezi w’u Rwanda, Dr. Nsengimana, ari kumwe n’Umuyobozi Mukuru w’Inama Nkuru y’Amashuri Makuru (HEC), bitabiriye Inama ya Mbere y’Abaminisitiri ku bijyanye n’Uburezi Bwo mu Muryango wa Afurika y’Iburasirazuba (EAC). Iyo nama ifite insanganyamatsiko igira iti: “Kunoza Ubumwe bw’Akarere binyuze mu Buhujwe mu Burezi Bwo mu Mashuri Makuru hagamijwe Iterambere Rirambye muri EAC.”
Iyi nama yahuje abaminisitiri b’uburezi, inzego zishinzwe politiki, n’abandi bafatanyabikorwa mu burezi baturutse mu bihugu byose bigize EAC. Intego nyamukuru ni ugukomeza ubufatanye n’ubumwe mu rwego rw’amashuri makuru, hongerwa imbaraga mu guhuzwa kwa porogaramu z’amasomo, uburyo bwo kugenzura ireme ry’uburezi ndetse n’uburyo bwo kwemera impamyabumenyi mu karere.
Mu ijambo rye, Dr. Nsengimana yashimangiye ko ubufatanye mu burezi ari umusingi w’iterambere rirambye. Yagize ati: “Iyo duhuriye hamwe tugahuza sisitemu z’uburezi bwo mu mashuri makuru, ntituba duharanira gusa ireme ry’uburezi, ahubwo tuba tunatanga amahirwe ku rubyiruko kugira ngo rube intangarugero mu rwego mpuzamahanga, kandi rutange umusanzu mu iterambere rya Afurika y’Iburasirazuba.”
Biteganyijwe ko iyi nama izasohoramo itangazo ry’abaminisitiri rizaba inzira ngenderwaho mu ishyirwa mu bikorwa ry’Uburezi Bwo mu Muryango wa EAC. Harimo ingamba zo guteza imbere uburyo bwo guhuriza hamwe no kwemera impamyabumenyi, guteza imbere ubushakashatsi buhuje ibihugu ndetse no kwita ku burenganzira bungana bwo kugera ku mashuri makuru.
Ukwitabira kw’u Rwanda muri iyi nama ni ikimenyetso cy’uko igihugu gikomeje gushyira uburezi mu murongo w’ibanze w’iterambere, no gushyigikira ubumwe n’iterambere rirambye mu Muryango wa Afurika y’Iburasirazuba.
