Uwahoze ari umukinnyi w’amakipe akomeye arimo Arsenal, Liverpool ndetse n’Ikipe y’Igihugu y’u Bwongereza, Alex Oxlade-Chamberlain, yarushinze n’umukunzi we w’igihe kirekire Perrie Edwards, uzwi cyane mu itsinda ry’abahanzikazi ryamamaye rya Little Mix. Ubu bukwe bwabaye nyuma y’imyaka myinshi aba bombi bakundana, aho bari basanzwe bafatwa nk’imwe mu miryango y’ibyamamare ikunzwe cyane mu Bwongereza. Amafoto y’ubukwe bwabo yasakaye ku mbuga nkoranyambaga agaragaza ibyishimo byinshi n’urukundo rwari rwuzuye hagati yabo.
Alex Oxlade-Chamberlain na Perrie Edwards batangiye gukundana mu mwaka wa 2016, nyuma yaho urukundo rwabo rugenda rukura ndetse banabyarana umwana w’umuhungu. Mu mwaka wa 2022, Chamberlain yambitse Perrie impeta amusaba kuzamubera umugore, ibintu byashimishije cyane abakunzi babo. Mu bukwe bwabo, inshuti magara, abo mu miryango yabo ndetse n’ibindi byamamare byo mu mupira w’amaguru no mu muziki byari byahari, bifatanya na bo muri uwo munsi w’amateka mu buzima bwabo.
Aya makuru yakiriwe neza n’abakunzi ba bombi hirya no hino ku Isi, aho benshi babifurije urugo ruhire n’ubuzima bwiza bw’abashakanye. Perrie Edwards akunzwe cyane kubera ibikorwa bye mu muziki, mu gihe Chamberlain azwi nk’umwe mu bakinnyi bagize ibihe byiza muri Arsenal na Liverpool ndetse wanakiniye igihugu cye mu marushanwa akomeye. Ubukwe bwabo bwabaye imwe mu nkuru z’imyidagaduro n’ibyamamare zikomeje kuvugisha benshi muri iyi minsi, cyane cyane ku mbuga nkoranyambaga aho amafoto yabo akomeje gukundwa n’abatari bake.
