Perezida wa Somalia, Mohamed Farmaajo, yatangaje ko yagiranye ikiganiro kuri telefoni n’umusifuzi mpuzamahanga Omar Artan nyuma y’uko yangiwe kwinjira muri Leta Zunze Ubumwe za Amerika, ibintu byamubujije kuzuza inzozi ze zo gusifura Igikombe cy’Isi cya 2026. Perezida Farmaajo yavuze ko yifuje kumwereka ko igihugu cyose kimuri inyuma muri ibi bihe bikomeye, anamwibutsa ko akomeje kuba ishema n’ikimenyetso cy’ibyiza Somalia ishoboye kugeza ku rwego mpuzamahanga.
Omar Artan yari yerekeje muri Amerika aho yari yatoranyijwe na FIFA mu basifuzi bazifashishwa mu mikino y’Igikombe cy’Isi cya 2026. Gusa ku wa 8 Kamena 2026, ageze ku Kibuga cy’Indege Mpuzamahanga cya Miami, yangiwe kwinjira muri icyo gihugu ndetse asubizwa inyuma. Kugeza ubu, inzego zishinzwe abinjira n’abasohoka muri Amerika ntiziratangaza ku mugaragaro impamvu nyamukuru y’iki cyemezo, ibintu byakomeje guteza impaka mu bakurikiranira hafi ruhago ku Isi.
Ibi byabaye mu gihe Somalia iri mu bihugu byashyizwe ku rutonde rw’ibifatiwe ibihano bijyanye n’ingendo zijya muri Amerika, hashingiwe ku mabwiriza yashyizweho n’ubutegetsi bwa Perezida Donald Trump. Nubwo Artan atazabasha kwitabira iri rushanwa rikomeye nk’uko yari yarabyiteguye, amagambo y’ihumure yahawe na Perezida Farmaajo ndetse n’inkunga akomeje guhabwa n’Abanya-Somalia benshi byatumye agaragara nk’intwari itatsinzwe n’iki kibazo. Kuri benshi, Omar Artan azakomeza kwibukwa nk’umwe mu basifuzi bagejeje Somalia ku rwego rwo hejuru muri ruhago mpuzamahanga, n’ubwo inzozi ze zo gusifura Igikombe cy’Isi zahagaze mu buryo butunguranye.
