Abanyeshuri batanu b’Abanyarwanda bari gukurikira amasomo y’ubupilote muri Leta Zunze Ubumwe za Amerika bakoze amateka akomeye nyuma yo gutwara indege bwa mbere mu rugendo ruganisha ku kuba abapilote b’umwuga. Hindura Cedric, Shyaka Francis, Hagenimana Henry Kenny, Isingizwe Milka na Mugabo Patricie ni bo banyeshuri bageze kuri iyi ntambwe ishimishije nyuma yo gutoranywa mu bakandida basaga 2600 bari bifuje ayo mahirwe yo kwiga ibijyanye n’indege.
Aba banyeshuri bari kwiga muri Kaminuza ya Kent State iherereye mu Mujyi wa Kent muri Leta ya Ohio, imwe mu zizwi cyane mu gutanga amasomo ajyanye n’indege n’ubwikorezi bwo mu kirere. Nyuma yo gutangira amasomo ya rusange mu ntangiriro za 2026, batangiye amasomo yo gutwara indege ku wa 1 Kamena. Ku wa 3 Kamena 2026, buri umwe muri bo yahawe amahirwe yo kwinjira mu ndege nto yo mu bwoko bwa Cessna, ayisuzuma mbere yo gutangira urugendo rwa mbere rwamaze iminota 30 ari kumwe n’umwarimu umuyobora.
Iyi ntambwe yafashwe nk’iy’amateka kuri aba banyeshuri ndetse no ku Rwanda muri rusange, kuko igaragaza ubushake n’ubushobozi bw’urubyiruko rw’u Rwanda bwo guhatanira amahirwe ku rwego mpuzamahanga. Kuba barabashije kugera kuri uru rwego nyuma yo gutsinda irushanwa rikomeye ryari ryitabiriwe n’ibihumbi by’abakandida, ni ikimenyetso cy’uko bafite ejo hazaza heza mu ruganda rw’indege. Benshi bakomeje kubifuriza kuzagera ku nzozi zabo zo kuzaba abapilote b’umwuga bazahagararira u Rwanda ishema mu kirere cy’Isi.
