Perezida w’Ishyirahamwe ry’Umupira w’Amaguru mu Rwanda (FERWAFA), Fabrice Shema, yasuye abatoza b’Abanyarwanda bari mu mahugurwa yo ku rwego rwa License B ya CAF, abasaba gukurikira amasomo yabo neza, gushyiramo umuhate no gutegura uburyo bazakoresha ubwo bumenyi mu guteza imbere ruhago y’u Rwanda. Aya mahugurwa ari kubera i Kigali, yitabiriwe n’abatoza batandukanye baturutse mu makipe yo mu cyiciro cya mbere n’icya kabiri ndetse n’abo mu makipe y’abana n’abagore.
Perezida Shema yavuze ko ayo mahugurwa ari kimwe mu by’ibanze mu rugendo rwo kubaka umupira w’amaguru ushingiye ku bumenyi n’ubushobozi. Yibukije abatoza ko kuba muri ayo mahugurwa bidahagije, ahubwo ko ari intangiriro y’urugendo rwo kumenya, kwiga no gukomeza kunoza imikorere yabo mu kazi kabo ka buri munsi.
Aya mahugurwa ari ku isomo rya kabiri, ahanini yibanda ku gusesengura umukino, uburyo bwo gutegura imyitozo ifite intego, imiyoborere y’abakinnyi, no gucunga ikipe mu buryo bwa gihanga. Abatoza bari guhugurwa kandi ku bijyanye n’imikoreshereze y’ikoranabuhanga mu isesengura ry’imikino n’imyitozo, kimwe mu bintu CAF isaba mu batoza bigezweho.
Umunyamabanga wa FERWAFA, hamwe n’abahagarariye CAF mu Rwanda, bashimye uburyo aya mahugurwa ateguwe, bavuga ko azatanga umusaruro w’igihe kirekire. Abatoza bitabiriye banashimiye ubuyobozi bwa FERWAFA ku bushake bwo kubafasha kuzamura urwego rwabo.
Perezida Shema yasabye ko buri wese mu batoza yagira uruhare mu gusakaza ubumenyi mu makipe yabo, kuko iterambere ry’umupira w’amaguru rishingiye ku guhererekanya ubumenyi, ubwitange no gukorera hamwe .
