Umugaba Mukuru w’Ingabo z’u Rwanda (RDF), Gen Mubarakh Muganga, yasabye amashuri makuru ya gisirikare yo ku mugabane wa Afurika gushyira imbaraga mu bufatanye, guhanga udushya no kwinjiza ikoranabuhanga mu myigire n’imyitozo, nk’inzira yo kubaka ubushobozi bwo guhangana n’ibibazo by’umutekano byugarije Afurika muri iki gihe isi ihanganye no kwinjira u ikoranabuhanga.
Ibi yabivuze kuri uyu wa Gatatu, ubwo yasozaga Inama ya 19 y’Abayobozi b’Amashuri ya Gisirikare ya Afurika (Association of African Colleges of Command – ACoC), yabereye mu Mujyi wa Kigali, ihuriyemo intumwa ziturutse mu bihugu 24 byo kuri uyu mugabane. Iyo nama yabaye urubuga rwo kungurana ibitekerezo ku buryo amashuri ya gisirikare y’Afurika ashobora gutanga umusanzu ufatika mu kurinda amahoro, guteza imbere ubumenyi n’ubushobozi bwa gisirikare bujyanye n’ibihe.
Gen Muganga yashimangiye ko muri iki gihe Afurika ihanganye n’ihindagurika ry’uburyo intambara n’ibibazo by’umutekano bigenda bifata isura nshya, bityo bikaba bisaba ko n’amashuri ya gisirikare ahindura uburyo bw’imyigishirize.
Yibukije ko ubufatanye hagati y’amashuri ya gisirikare yo ku mugabane ari urufunguzo mu gukemura ibibazo byambukiranya imipaka, aho buri gihugu gikwiye gusangira ubunararibonye n’ubumenyi gifite. Yavuze ko RDF yiteguye gukomeza gufatanya n’ibindi bihugu mu guteza imbere uburezi bwa gisirikare, binyuze mu mahugurwa, amasomo ashingiye ku bushakashatsi n’ubumenyi bugezweho.
Iyi nama isoje igaragaje icyerekezo gishya cyo kubaka uburezi bwa gisirikare bujyanye n’ikoranabuhanga n’udushya, aho Afurika igomba guharanira kugira abasirikare b’abahanga, bafite ubushobozi bwo guhangana n’ihindagurika ry’ibihe, mu kurinda umutekano n’iterambere ry’abaturage bayo.
