Abahanzi babiri b’abanyempano barimo Kivumbi King na Mike Kayihura bateguye igitaramo cy’amateka kizabera muri Kigali Universe ku itariki ya 13 Ukuboza 2025, aho bazumvisha abakunzi b’umuziki wabo indirimbo ziri kuri EP yabo nshya yise ‘Installation’. Ni igitaramo gitegerejwe n’abatari bake, cyane ko ari nyuma y’uko aba bahanzi bombi bagaragaje ubuhanga budasanzwe mu guhuriza hamwe injyana zitandukanye z’ubuhanzi bwabo mu buryo buvuga ku rukundo, ubuzima, n’amarangamutima y’umuntu.
EP Installation, yashyizwe hanze mu mezi make ashize, yakiriwe neza n’abakunzi b’umuziki w’u Rwanda no hanze yarwo. Irimo indirimbo zigaragaza ubu kaka nubushongore bwa buri muhanzi, ariko kandi zigaragaza uburyo Kivumbi King na Mike Kayihura bashoboye guhuza imirongo yabo mu buryo butunganye bakabyazamo ikintu kinini. Kivumbi King, uzwi mu njyana zifite umwimerere uva mu mizi y’u Rwanda, asanzwe yandika indirimbo zifite amagambo akomeye kandi atanga ubutumwa, mu gihe Mike Kayihura, uzwiho ijwi riririmba mu buryo bworoshye kandi buhebuje, yongera kuri izo mbaraga z’umwuka wa soulful n’ubuhanga bwo gutambutsa amarangamutima.
Mu kiganiro bagiranye n’itangazamakuru, aba bahanzi bavuze ko iki gitaramo kizaba ari umwanya wo “guhuza imitima n’abakunzi babo”, aho bazaririmbira mu buryo bwa live ndetse bakazanasangiza abafana ubuzima bwo gukora EP, n’ubutumwa buri mu ndirimbo zayo. Igitaramo Installation Live Experience kizaba kirimo abahanzi batandukanye bazabafasha gushyushya stage.
Iki gitaramo giteganyijwe kuba kimwe mu bizasiga isura nshya ku muziki nyarwanda, kigaragaza ko ubufatanye hagati y’abahanzi bushobora kuvamo umusaruro ufatika kandi w’umwimerere
