Ukwezi kwa 11 kwa 2025 kuzaba igihe cy’intsinzi n’ibyishimo ku bahanzi nyarwanda batandukanye, aho ibikorwa byabo by’ubuhanzi n’ubusabane byongeye kwerekana ko umuziki nyarwanda uri ku rugero rwo hejuru kandi ugenda utera imbere umunsi ku wundi.Mu ijoro ryo ku wa Mbere tariki 3 Ugushyingo 2025, umuramyi Richard Nick Ngendahayo yageze i Kigali nyuma y’imyaka 17 ataratera ikirenge mu Rwanda
Yakirijwe n’ibyishimo n’amarira y’umunezero n’abaramyi bagenzi be ndetse n’abakunzi b’ibihangano bye. Uyu muhanzi ukunzwe cyane mu ndirimbo ziramya kandi zihimbaza Imana yagarutse nk’umwe mu bahanzi b’abanyarwanda bakomeje kugira uruhare mu guteza imbere umuziki wo kuramya n’uguhimbaza Imana ku rwego mpuzamahanga
Mu rwego rwo gukomeza kugaragaza iterambere ry’abaramyi, Umuhanzikazi Mucyowera Jessica yakoze igitaramo cye cya mbere cy’amateka kuva yinjiye mu muziki. Iki gitaramo cyabaye icy’umunezero n’umwuka w’ubwiza, aho yashyigikiwe n’abakozi b’Imana ndetse n’abahanzi bagenzi be benshi, bigaragaza uburyo umuziki wo kuramya urimo gufata indi ntera mu Rwanda.Ku ruhande rw’imyidagaduro, ku wa 1 Ugushyingo 2025
BK Arena yahindutse inzu y’umuziki n’ibyishimo ubwo yakiraga ibirori bya The Silver Gala ku nshuro ya kabiri. Ibyo birori byahurije hamwe ibyamamare bitandukanye n’abakunzi b’imyidagaduro bo mu Rwanda no hanze yarwo, birimo abahanzi, abayobozi, abavangamiziki ndetse n’abafatanyabikorwa batandukanye b’urwego rw’ubuhanzi
Mu gihe abantu benshi bari bategereje isubukurwa ry’igitaramo Music in Space, abategura iki gikorwa batangaje ko mbere yo kugitangiza bateguye Music in Space Reunion Party, igikorwa cy’ubusabane n’umuhuro hagati y’abahanzi, abafana ndetse n’abategura iki gitaramo. Biteganyijwe kuba ku wa Gatanu tariki 7 Ugushyingo 2025 muri Kigali Universe, aho hazahurira abahanzi bakomeye
nka Davis D, Bushali, Diez Dola, Drizzy, DJ Benda, ndetse n’abaturutse muri Afurika y’Epfo nka Bizizi & KayGee na Mac J, hamwe n’Umunya-Uganda Sir Kisoro.Kuri iyi gahunda y’imyidagaduro n’ubuhanzi, abarimo Naason, Makanika, n’abandi bavangamiziki batandukanye bitabiriye umunsi wo kwakira abanyempano ba Harmony Africa
Abo banyempano bagiye kwigishwa uburyo bwo kubyaza umusaruro impano zabo binyuze mu gusubiramo (repetition), bitegura igitaramo gikomeye Harmony Africa Plurse kizahuza abahanzi nka Fireman Vayo, Double Jay Once Again, Bushali, n’abandi benshi, kizabera muri Kigali Universe ku wa 8 Ugushyingo 2025
Igitaramo Mic Tribe cyasubiye kuba muri Mundi Center, gihuriza hamwe abaraperi batandukanye barimo Bushali, Bulldog, Logan Joe, Kenny K Shot, na Angel. Iki gitaramo cyongeye kugaragaza ko injyana ya Hip Hop ikomeje kwiyubaka no kugenda igaragariza ubudasa muri muzika nyarwanda
Kugeza ubu tariki ya 5 Ugushyingo 2025, ibitaramo bikomeje gutegurwa hirya no hino mu Rwanda, cyane cyane muri Kigali. Ni igihe kigaragaza ko umuziki nyarwanda uri mu bihe byiza, aho abahanzi batandukanye bakomeje gutangaza amatariki y’ibitaramo byabo.Ubu byamaze no kumenyekana ko Papa Cyangwe azakora igitaramo gikomeye tariki 22 Ugushyingo 2025 muri Kigali Universe
mu gihe n’abandi bahanzi bamaze gutangaza gahunda zabo z’ibitaramo bitandukanye muri uku kwezi kumwe kwa Ugushyingo.Kugeza ubu, ibitaramo bimaze kuba ndetse n’ibiri gutegurwa birarenga bitandatu (6), byose bikaba bigaragaza ishusho y’uko abahanzi bari gusarura ibyo babibye mu myaka yashize, bagahura n’abakunzi babo nyuma y’imirimo myinshi yo gukora umuziki
Uburyo ibitaramo bikomeje gutegurwa n’ubwitabire bukomeje kwiyongera ni ikimenyetso cy’uko umuziki nyarwanda uri kugenda ugira imbaraga n’uruhare rukomeye mu gususurutsa abakunzi bawo Ukwezi kwa 11 kwa 2025 kurimo Gutanga ishusho nshya umuziki nyarwanda, haba mu ruhando rwo kuramya no guhimbaza Imana, haba no mu rwego rw’imyidagaduro n’injyana zose. Abahanzi nyarwanda bakomeje kwerekana ko bafite impano, ubuhanga n’ubwitange, kandi ko umuziki wabo ugezweho ushobora guhanganira ku rwego mpuzamahanga.
