Umukino wa Fencing, ukomoka mu kinyejana cya 15 na 16 (15ᵉ–16ᵉ Century), ni umwe mu mikino ya kera yakomotse ku myitozo y’intwaro (épée, foil, sabre) ndetse ugezweho ukaba umwe mu mikino igereranya ubuhanga, umuvuduko n’ubushishozi. Nubwo ari umukino ukiri mushya mu Rwanda, ufitanye amateka akomeye n’iterambere mu rwego mpuzamahanga.
UWIHOREYE Tufaha, umutoza n’umukinnyi w’icyamamare, ni we munyarwandakazi wa mbere wagejeje u Rwanda ku rwego rw’imikino Olempike muri uyu mukino wa Fencing. Avuka ku itariki ya 1 Mutarama 1996 i Nyamirambo mu Mujyi wa Kigali, Tufaha akina mu cyiciro cy’abagore (Senior Women’s épée) akoresheje intwaro ya épée, akaba akinira mu kigo cy’imyitozo cya Dreams Fencing Club giherereye i Kigali.
Mu mikino Olempike ya Paris 2024, Tufaha Uwihoreye yanditse amateka ubwo yabaye umukinnyi wa mbere w’u Rwanda witabiriye Fencing Olympics. Yitabiriye mu cyiciro cya Women’s épée, aho yatsinzwe na Miho Yoshimura w’Ubuyapani ku manota 7 kuri 15, ariko asiga yanditse izina rye mu mateka y’imikino nyarwanda.
Umutoza UWIHOREYE Tufaha, ubwo yagiranaga ikiganiro n’umunyamakuru wa Mavete.com, Mucyo Felicien, yasobanuye birambuye umukino wa Fencing, umwe mu mikino ikeneye kumenyekana mu Rwanda ariko ufite ejo heza. Uyu mukino, usaba ubwitonzi, imbaraga n’ubuhanga bwo gutekereza byihuse, urimo kugenda usakara cyane mu rubyiruko rw’u Rwanda.
UWIHOREYE yavuze ko Fencing atari umukino gusa wo kwidagadura, ahubwo ari n’isoko y’amahirwe y’ubukungu kuko ushobora gutunga uwukina. Ati: “Fencing ni umukino mwiza cyane, ubyara amafaranga, kandi urimo amahirwe menshi cyane ku rubyiruko. Ni nawo ukomeje kuntunga, kandi ni urwego nshaka kuzamura mu gihugu cyacu.”
UWIHOREYE amaze imyaka 15 akina uyu mukino, akaba yarawutangiye afite imyaka 13. Yize iby’ubutoza kandi yagiye yitabira amahugurwa n’amarushanwa mpuzamahanga atandukanye, arimo:
- 2021: yahawe impamya bumenyi ya Master Swords ayikuye mugihugu cya Algeria nkumutoza wakwigisha umukino wa fencing ku Isi hose.
- 2015: yitabiriye Imikino ya all African games mumukino wa fencing yabereye Brazzaville arinabwo avuye gukina champions yisi mugihugu cy’ubu Russia
- 2025: African Fencing Championship yabereye i Lagos, Nigeria
- 2024:yitabiriye imikino Olympic yabere Paris ahagarariye urwanda mumukino wa Fencing
- 2025:World Fencing Championship yabereye Georgia
- 2025: Yabaye vice-president wishyirahamwe ryaba Olympians mu Rwanda.
Mu mwaka wa 2019, Tufaha yashinze Dreams Fencing Club hanyuma iza kugira imbaraga mumwaka wa 2021 kuko yari avuye kwiga ubutoza. yari agamije guteza imbere uyu mukino mu rubyiruko rw’u Rwanda, ndetse ubu iyi kipe yitegura kwerekeza muri Kenya mu Ugushyingo 2025 mwirushanwa ryitwa East African Clubs league, aho muri Kenya hazahurira ibihugu bya East Africa byose , Aha iri rushanwa rizahuza u Rwanda , Uganda, na Kenya mu marushanwa mpuzamahanga yo gutsura ubucuti n’iterambere ry’uyu mukino muri Afurika y’Iburasirazuba.
UWIHOREYE yashimiye ababyeyi bemerera abana gukina uyu mukino, abasaba gukomeza kubashyigikira no kubohereza kwiga Fencing, ariko anasaba Minisport n’Ishyirahamwe rya Fencing mu Rwanda (Rwanda Fencing Federation – RFF) gukomeza gushyigikira iterambere ryawo.
Kuri ubu, Rwanda Fencing Federation ifite icyicaro ku Amahoro National Stadium i Kigali. Kuva muri Kanama 2024, Isaac Ngendahimana ni we uyiyobora, akaba asimbuye Paul Boa. Ngendahimana, wahoze ari umukinnyi wa martial arts, yatangaje ko intego ye ari ukuzamura uyu mukino mu gihugu hose, kongera amarushanwa, kubona ibikoresho bihagije no gutegura abakinnyi bazahagararira u Rwanda muri Los Angeles 2028 Olympics.
Fencing ikiri umukino mushya mu Rwanda, imbaraga z’abakunda uyu mukino, by’umwihariko UWIHOREYE Tufaha, zerekana ko ejo hazaza hawo mu gihugu ari heza kandi hitezweho byinshi.
