Aha ni nyuma Y’urupfu rwa Gogo, wari umuhanzi kazi ukunzwe cyane ku mbuga nkoranyambaga, rwashenguye benshi mu nshuti, abavandimwe ndetse n’abamukurikiranaga kuri YouTube. Ariko kandi, nyuma y’urupfu rwe, hashize iminsi micye, habaye impagarara zikomeye hagati y’abagize umuryango we n’abakunzi be ku bijyanye n’uyu muyoboro wa YouTube.
Incuti ndetse n’abavandimwe ba hafi ba nyakwigendera batangaje ko bakeneye ko YouTube channel ye, cyangwa amafaranga ayivamo, byegurirwa umuryango kugira ngo bibafashe mu bikorwa bikenewe cyane muri iki gihe, cyane ko kugeza ubu umurambo wa Gogo utari urashyingurwa.
Abakoresha imbuga nkoranyambaga bo ntibacecetse. Benshi bakomeje kunenga umuryango wa Gogo bavuga ko kwibanda ku bijyanye n’umuyoboro wa YouTube no ku nyungu zawo mu gihe umurambo utararuhuka ari nko gushinyagurira nyakwigendera.
Mu magambo akomeye, bamwe mu bakunzi be banditse bati: “Gogo yari umuntu wacu twese. Gushyira imbere amafaranga ya YouTube kurusha kumushyingura neza ni agasuzuguro gakabije.”
Bikemu Uwayesu, wari ushinzwe inyungu z’umuhanzi, yavuze ko gahunda yo kumushyingura iri gutegurwa, kandi yashimye Ambasade y’u Rwanda muri Uganda ku bufasha bwihariye yatanze muri ibi bihe. Ati: “Igihugu ni umubyeyi, kandi mu bihe nk’ibi tugomba kugaragarizwa ko tutari twenyine.”
Kugeza ubu, impaka ziracyakomeje, ndetse YouTube channel ya Gogo ikomeje kuba intandaro y’amagambo akomeye hagati y’umuryango we n’abakunzi be.
Inshuti, ndetse n’abakunzi be bose, Imana ikomeze kubaha imbaraga no kubaherekeza muri ibi bihe by’akababaro, kandi Imana imwakire mubayo.
