Gisagara – Minisitiri w’Intebe, Dr. Nsengiyumva, yakomeje uruzinduko rwe mu Ntara y’Amajyepfo asura uruganda rutunganya amashanyarazi akomoka kuri nyiramugengeri, ruzwi nka Hakan Peat to Power Plant, rufite ubushobozi bwo gutanga megawati 80.
Uru ruganda, ruherereye mu gace k’Uruzi rw’Akanyaru mu Karere ka Gisagara, rutekerejwe nk’igikorwa cy’ingenzi mu rwego rwo kongera ingufu z’amashanyarazi mu gihugu. Ni kimwe mu mishinga ikomeye igamije gushyigikira gahunda ya Leta yo kugeza amashanyarazi ku baturage bose , no guteza imbere iterambere rirambye rishingiye ku mutungo kamere w’igihugu.
Dr. Nsengiyumva yashimye uruhare uru ruganda rugira mu rwego rw’ingufu, agaragaza ko ari icyitegererezo cy’uko igihugu gishobora gukoresha ibyakorerwa imbere mu gihugu mu guhangana n’ihindagurika ry’ikirere no kugabanya ikibazo cy’amashanyarazi make.
Yavuzeko Uru ruganda atari uruganda rw’amashanyarazi gusa, ahubwo arisoko y’iterambere. Ruzafasha mu guha abaturage amashanyarazi ahendutse kandi afite ingufu, binyuze mu bufatanye mubibikorwa by’ishoramari, guteza imbere ubukungu ndetse no kongera imirimo ku rubyiruko.”
Ubuyobozi bw’uruganda buvuga ko Hakan Peat to Power Plant itanga ingufu zingana na megawati 80, zifasha gushyigikira urusobe rw’imirimo n’inganda mu gihugu, ndetse ikaba ari n’isoko y’akazi ku baturage bo mu Ntara y’Amajyepfo.
Inzobere mu by’ingufu zo ziti ” uyu mushinga utanga umusanzu ukomeye mu kugera ku ntego u Rwanda rwihaye yo kwihutisha iterambere binyuze mu kongera ikoreshwa ry’ingufu zisangiwe na bose.
Uyu mushinga wubatswe ku bufatanye bwa Leta n’abashoramari bigenga, ugaragaza uburyo ubufatanye bwa Leta n’abikorera (PPP) bushobora kuba isoko y’iterambere ry’igihugu, mu gihe bwita ku gukoresha umutungo kamere mu buryo burambye.
