Imyiteguro y’Isiganwa ry’Amagare ry’Isi (UCI Road World Championships 2025) rizabera i Kigali kuva ku wa 21 kugeza ku wa 28 Nzeri 2025 yamaze kurangira. Abategura iri siganwa batangaje ko ibikoresho byose by’ingenzi n’ibikorwa remezo byari bisabwa byamaze gushyirwa ku murongo, ndetse n’amakipe menshi azahatana yamaze kugera mu Rwanda.
Iki ni cyo gikorwa cya mbere cy’Isi mu mukino w’amagare kibereye ku mugabane wa Afurika, bigaragaza intambwe ikomeye u Rwanda rumaze gutera mu mikino mpuzamahanga no mu rwego rwo kwakira ibikorwa bikomeye. Abayobozi ba UCI ndetse na Minisiteri ya Siporo mu Rwanda batangaje ko biteze ko iri siganwa rizasiga urwibutso rukomeye mu mateka y’imikino n’ubukerarugendo.
Ariko kandi, amakuru agezweho agaragaza ko ikipe ya Repubulika Iharanira Demokarasi ya Congo (RDC) yatangaje ko itazitabira iri siganwa, aho yatangaje impamvu zayo zijyanye n’ibibazo by’itegurwa ry’imbere mu gihugu cyayo.Abakinnyi n’amakipe atandukanye yo ku migabane yose yamaze kugera mu Rwanda, uretse Repubulika Iharanira Demokarasi ya Congo (RDC)
Mu bakinnyi bakomeye bitezwe i Kigali, harimo Remco Evenepoel wo mu Bubiligi, wamaze kuba icyamamare mu gusiganwa ku gice cy’isaha (time trial). Evenepoel azaba aherekejwe n’itsinda rikomeye ry’Igihugu cye ririmo Tiesj Benoot, Victor Campenaerts na Cian Uijtdebroeks. Ku ruhande rwa Espagne, Juan Ayuso na Marc Soler nibo bazayobora itsinda ryabo mu bagabo, mu gihe Mavi García azaba ari mu ikipe y’abagore. U Bufaransa buzaba bufite Julian Alaphilippe mu bagabo ndetse na Pauline Ferrand-Prévot mu bagore, bafatanyije na Juliette Labous na Évita Muzic. Australia izaza iyobowe na Neve Bradbury na Jai Hindley, mu gihe Ubwongereza buzahagararirwa na Tom Pidcock, Oscar Onley na Anna Henderson.
Mu ruhande rwa Afurika, u Rwanda ruzaba rufite abakinnyi b’ingeri zitandukanye mu byiciro by’abakuru, abato (U23) ndetse n’abakiri bato (junior). Eritrea, Algeria, Afurika y’Epfo, Ethiopia, Uganda, Morocco, Tunisia na Mauritius nabyo byemeje kuzana amakipe yabo. Ibi bigaragaza ko isiganwa rya Kigali rizaba n’umwanya wo guhuza impano nshya z’Afurika n’abakinnyi bazwi ku rwego rw’Isi.
Isiganwa rizaba rigizwe n’ibice 13, harimo iryo ku giti cy’umuntu mu gusiganwa ku masaha (time trials), isiganwa rusange (road races), icyiciro cya mixed relay, ndetse n’icyiciro gishya cy’abagore bakiri bato (U23 women) kizakorwa ku nshuro ya mbere mu mateka y’iri siganwa. UCI yemeje ko Kigali yatoranyijwe kubera umutekano wayo, ubushobozi bwo kwakira ibikorwa mpuzamahanga n’imbaraga u Rwanda rwasize mu guteza imbere siporo y’amagare.
Kuva ku wa 21 Nzeri, amaso yose azaba ahanzwe kuri Kigali, aho abasiganwa baturutse hirya no hino ku Isi bazahatana ku mihanda izaba ifunze mu gihe cy’isiganwa. Abanyarwanda basabwe gushyigikira iri siganwa no kurikurikirana mu mucyo, mu gihe igihugu cyose n’Umugabane wa Afurika biteze ko kizaba urubuga rwo gusigasira amateka mashya y’umukino w’amagare.
Biteganyijwe ko abasiganwa bazanyura mu mihanda inyuranye y’Umujyi wa Kigali izaba ifunze mu gihe cy’isiganwa, aho abaturage basabwa gushyigikira iri siganwa ariko banubahiriza amabwiriza y’ubwirinzi n’umutekano.
UCI yagaragaje ko Kigali yatoranyijwe kubera umutekano wayo, ubushobozi bwo kwakira ibikorwa mpuzamahanga, ndetse n’uburyo igihugu cyashyize imbere guteza imbere siporo y’amagare mu buryo burambye.
Kuva ejo, amaso yose azaba ahanzwe i Kigali, aho abakunzi b’imikino bitezweho kuryoherwa n’amashusho n’isura nziza y’u Rwanda, mu gihe abasiganwa bazaba bahatanira ibikombe by’icyubahiro.
