Mu nama y’Itsinda ry’Inshuti zishyigikiye Itegeko Nshinga ry’Umuryango w’Abibumbye (Friends in Defense of the UN Charter), Minisitiri w’Ububanyi n’Amahanga wa Venezuela, Yván Gil, yatangaje ko uBurundi bwakiriwe nk’umunyamuryango mushya, ashimira ubwitabire n’icyubahiro bwagaragaje.
Uyu muyobozi yavuze ko iri tsinda rimaze imyaka ine rishinzwe ritangiye kugaragaza umusaruro mu bikorwa byo guharanira amahoro ku isi, Minisitiri Gil yagaragaje ko iri tsinda ryiyemeje kwamagana ibikorwa byose by’agasuzuguro n’ibitero bihungabanya ubusugire bw’ibihugu, biba binyuranyije n’amategeko agenga Itegeko Nshinga ry’Umuryango w’Abibumbye.
Yanavuze ko mu rwego rw’Inteko Rusange y’Umuryango w’Abibumbye, Venezuela n’itsinda byagize ibiganiro bya dipolomasi bigera kuri 50 hagati y’ibihugu binyuranye, bigaragaza ko iri tsinda riri kugenda rigira ijwi rikomeye mu ruhando mpuzamahanga no mugukemura ibibazo byinshi.
Gil yashimangiye ko Venezuela idashyizwaho ubwigunge, ahubwo ifatanyijwe n’imiryango myinshi n’ibihugu byo ku isi byagaragaje ubufatanye budacogora, bushimangira ubusabane n’ubumwe mu guharanira amahoro n’ubutabera ku isi ari nabyo byibanze uyu muryango washingiwe.
