Kuri uyu wa Gatatu nimugoroba, kuri Stade Amahoro, hakinirwa umukino w’amajonjora yo gushaka itike ya FIFA World Cup 2026 uhuza amakipe y’ibihugu bya Ethiopia 🇪🇹 na Guinea-Bissau 🇬🇼. Uyu mukino wabereye mu Rwanda kuri stade Amahoro, wagaragaje uko igihugu gikomeje kubaka izina rikomeye nk’ahantu hakundwa n’amakipe mpuzamahanga yo gukiniramo.
Minisitiri wa Siporo, Nelly Mukazayire, yavuze ko uyu mukino ari ikimenyetso cy’uko u Rwanda rumaze kugirirwa icyizere mu rwego rw’imikino, bitewe n’ishoramari rikomeje gushyirwa mu kubaka ibikorwaremezo bigezweho.
Yagize ati: “Umukino wa Ethiopia na Guinea-Bissau kuri Stade Amahoro urerekana aho tugeze mu rugendo rwo guteza imbere siporo. U Rwanda rurimo kugaragara nk’igihugu gifite ibikorwaremezo byujuje ubuziranenge, bifasha kwakira ibikorwa mpuzamahanga bikomeye.”
Minisitiri Mukazayire yongeyeho ko gahunda ya Leta ari ugukomeza guteza imbere siporo nk’imwe mu nkingi zifasha igihugu mu bukungu, ubukerarugendo ndetse no guteza imbere urubyiruko.
Stade Amahoro, imwe mu zigezweho muri Afurika, ikomeje kuba ishema ry’u Rwanda mu kwakira imikino y’amateka ikurikirwa n’abantu benshi, ikaba n’ikimenyetso cy’uko igihugu cyiyubatse mu buryo bugaragara mu rwego rwa siporo.
