Mu gitondo cyo kuri iki Cyumweru, tariki ya 5 Ukwakira 2025, abakozi ba Lodge iherereye mu Karere ka Rubavu bafashwe n’ikiniga ubwo basangaga umugabo uri mu kigero cy’imyaka 27 yapfuye, amanitse mu mugozi mu cyumba yarayemo wenyine.
Amakuru agera kuri Mavete.com dukesha umunyamakuru sam kabera avuga ko uwo mugabo yari yinjiye muri iyo Lodge ku wa Gatandatu nimugoroba, asezera ko ari buraremo ijoro rimwe. Byageze mu gitondo atarasohoka cyangwa ngo agaragaze icyerekezo, bituma abakozi bagerageza kumuhamagara ariko ntihagira usubiza. Nyir’icumbi yahise mo gufungura urugi afatanyije n’abandi bakozi, maze basanga nyir’ubuzima amanitse mu mugozi.
Uwo mugabo bivugwa ko nta bandi bari kumwe na we ubwo yageraga muri Lodge, ndetse nta bimenyetso by’imirwano cyangwa iby’urugomo byabonetse mu cyumba. Inzego z’umutekano zahise zitabazwa, umurambo ujyanwa ku bitaro bya Gisenyi Hospital kugira ngo ukorerwe isuzuma (autopsie) rizasobanure icyateye urwo rupfu.
Kugeza ubu, iperereza riracyakomeje ngo hamenyekane niba uwo mugabo yiyahuye cyangwa se niba hari undi muntu ushobora kuba afite aho ahuriye n’urwo rupfu. Inzego z’umutekano zatangaje ko zizatangaza amakuru arambuye nyuma y’iperereza ryimbitse.
Ubuyobozi bw’Akarere ka Rubavu bwo bwibukije abaturage ko bagomba kujya bahitamo gusangira ibibazo n’inshuti, abavandimwe cyangwa inzego z’ubuzima mu gihe bari mu bihe bikomeye, aho guhitamo inzira yo kwiyahura.
Iyi nkuru yababaje benshi mu batuye umujyi wa Rubavu, aho benshi basaba ko hakomeza ubukangurambaga bwo gufasha abantu bafite ihungabana cyangwa ibibazo by’imibereho kugira ngo ubuzima bw’abantu burindwe hakiri kare.
