Ikigo cy’Igihugu Gishinzwe Kurengera Ibidukikije (REMA) cyafunze by’agateganyo uruganda rwa SteelRwa Industries Ltd, ruherereye mu Karere ka Rwamagana, mu rwego rwo kurinda ubuzima bw’abaturage n’ibidukikije.
Amakuru aturuka mu nzego zishinzwe igenzura agaragaza ko uru ruganda rwagaragaweho kudakurikiza amabwiriza ajyanye no gusohora imyanda iteje ingaruka ndetse n’imyotsi, birimo umwuka n’amazi nindi myanda ituruka muruganda bisohorwa nurwo ruganda .
REMA yatangaje ko ihazabu cyangwa ifungwa ry’igihe kirekire rizafatwa hashingiwe ku bisubizo bizagaragara mu isuzuma ryimbitse riri gukorwa, kandi isaba andi masosiyete akora mu nganda “kwubahiriza amahame yo kubungabunga ibidukikije kugira ngo iterambere ridahungabanya ubuzima bwibidukikije ndetse nimibereho ya muntu.”
Abatuye hafi y’uruganda bavuga ko igihe kinini bamaze bitotombera umwuka uhumanya n’imyanda iva mu ruganda, basaba ko hashyirwaho uburyo burambye bwo kugenzura inganda kugira ngo ibikorwa by’iterambere bidakomeza kugira ingaruka ku buzima bwabo.
Ni inshuro ya mbere muri uyu mwaka REMA ihagarika uruganda runini rwo mu Burasirazuba ku mpamvu zerekeye ibidukikije, bikaba bigaragaza ubushake bwa Leta bwo gushyira imbere kurengera ibidukikije n’ubuzima rusange.
