Umujyi wa Kinshasa wabaye isibaniro ry’imvururu ku munsi w’ejo, nyuma y’umukino wahuje Repubulika Iharanira Demokarasi ya Congo (RDC)Leopards na Senegal mu mukino yo gushaka itike y’igikombe cy’isi (World Cup Qualifiers). Ikipe ya Senegal yatsinze RDC ibitego 3-2, aha ariko ni mugihe ikipe ya congo yari yabanje ibitego 2 kubusa nyuma Senegare iza gukora come back iranatsinda,ibintu byatunguye abafana benshi bari buzuye Stade des Martyrs, maze ibyishimo bihinduka umujinya udasanzwe.
Nyuma y’umukino, amashusho yakwirakwijwe ku mbuga nkoranyambaga yagaragaje abafana benshi ba RDC basenya intebe ziri muri stade, abandi bagasimbuka bakinjira mu kibuga. Ibyo bikorwa byakuruye impaka twakibaza ngo niki Perezida Félix Tshisekedi, uzwi nka “Fatshi”, ashobora kuvuga kuri aya makosa yagaragajwe n’abaturage imbere y’amahanga?
Iyi ntsinzi ya Senegal yabaye igikomye mu nkokora ku rugendo rwa RDC rwo gushaka itike y’igikombe cy’isi kizaba muri 2026. Abakinnyi ba RDC bari bayoboye umukino mu minota ya mbere, ariko nyuma yaje guhindukirwa n’ubunararibonye bwa Senegal, by’umwihariko ubuhanga bw’abakinnyi nka Sadio Mané na Ismaïla Sarr, byatumye amakipe anganya mu buryo bugaragara maze Senegal ikabona igitego cya gatatu cyatsindiwe mu minota ya nyuma.
Abafana benshi bari biteze intsinzi y’iwabo, ariko gutsindwa kwa nyuma byabababaje bikomeye. Umwuka wakomereje hanze ya stade, aho hari n’abandi bagaragaje imyigaragambyo yo kutishimira imikinire y’ikipe yabo ndetse no gushinja ubuyobozi bwa federasiyo ya ruhago mu gihugu kutita ku rwego rw’imyiteguro.
Inzego z’umutekano zari zashyizwe hafi ya stade zabashije kugabanya ubukana bw’imvururu, nubwo hari ibikoresho byinshi byangijwe ndetse bamwe mu bafana bakomeretse mu gihe bageragezaga gusohoka mu kivunge.
Abasesenguzi mu bya siporo bavuga ko ibi bibazo bikwiye gufatirwa ingamba hakiri kare, kuko gukomeza kwangiza ibikorwaremezo by’imikino bishobora gusubiza RDC inyuma mu iterambere rya siporo. Banashimangiye ko gucunga umutekano mu mikino ikomeye ari ingenzi, cyane cyane mu gihe RDC ikomeje guhatanira umwanya mu marushanwa akomeye ku rwego rw’isi.
Uyu mukino uzakomeza kuvugisha benshi, cyane cyane kubera ishusho RDC yihesheje imbere y’amahanga. Ikibazo gisigaye ni uko ubuyobozi bw’igihugu n’ubwa ruhago buzafata iki gikorwa cyabaye isomo rikomeye ku bijyanye n’imyitwarire y’abafana ndetse n’uburyo bwo gucunga amarangamutima mu mikino ikomeye.
