Kuri uyu wa 13 Ukwakira 2025, Abanyagihugu b’i Burundi bibuka imyaka 64 ishize Intwari yubwigenge, Umuganwa Rudoviko Rwagasore aguye urw’abagabo. Yishwe ku wa 13 Ukwakira 1961 i Bujumbura, nyuma y’iminsi mike atsindiye amatora yo kuba Minisitiri w’Intebe w’igihugu cyari kigiye kubona ubwigenge.
Uyu munsi wo kwibuka ufite agaciro gakomeye mu mateka y’Uburundi, kuko ushimangira ubutwari n’urukundo rw’igihugu byaranze Rwagasore. Yari umusore w’intwari, wiyemeje guharanira ubwigenge bw’igihugu cye n’uburinganire mu banyagihugu, agaharanira ko Uburundi buyoborwa n’Abarundi ubwabo, aho kuba mu maboko y’abakoroni.
Mu birori byabereye hirya no hino mu gihugu, abayobozi n’abaturage basabye urubyiruko gukomeza kwigira ku rugero rwe rw’ubwitange, gukunda igihugu, kurwanya amacakubiri no gushyira imbere inyungu z’igihugu kurusha iz’umuntu ku giti cye. Bavuze ko kwibuka Rwagasore bitagomba gufatwa nk’umugenzo, ahubwo ari uburyo bwo gusubiza amaso inyuma no kongera kwiyemeza gukomeza umurage we.
Ubutumwa bw’ingenzi bwatanzwe bwasabye Imana gukomeza kurinda Uburundi, no kugwiza abantu bafite umutima w’ubutwari n’ubudahemuka nk’ubwa Rwagasore.
Kwibuka Umuganwa Rudoviko Rwagasore si ugushyingura amateka mu bitabo, ahubwo ni ugukomeza gusigasira umurage we, kugira ngo Uburundi bukomeze kuba igihugu cy’amahoro, ubumwe n’iterambere — igihugu cy’abana bacyo bose bubakira ku ndangagaciro z’ubutwari n’urukundo rw’ukuri.
