Muruyu mugoroba wo kuri uyu wa Gatatu taliki 22 ukwakira2025, Minisitiri w’Intebe Dr. Nsengiyumva yahaye ikaze mu biro bye Madamu Aurélie Royet-Gounin, Ambasaderi w’u Bufaransa mu Rwanda, kugirango baganire ibiganiro bigamije gukurura no gushimangira umubano n’ubufatanye hagati y’u Rwanda n’u Bufaransa mu nzego zitandukanye .
Ibiganiro byabo byavuze cyane cyane ku gushimangira amahirwe ari mu mubano w’ibihugu byombi no ku kurebera hamwe uburyo hashyirwamo imbaraga mu bikorwa bihuriweho nibihugu byombi , byumwihariko mu by’uburezi, ikoranabuhanga, ubukerarugendo ndetse n’urwego rw’ubucuruzi. Madamu Royet-Gounin yahamije ko u Bufaransa bushima intambwe u Rwanda rwateye kuko rugeze kure mubukungu bushingiye ku bumenyi n’udushya, yongeraho ndetse anashimangira ko igihugu cye cyiteguye gukomeza kuba umufatanyabikorwa w’ingenzi muri urwo rugendo.
Ku ruhande rwe, Minisitiri w’Intebe Dr. Nsengiyumva yashimiye Ambasaderi ku ruhare rw’u Bufaransa mu kuginyuma gahunda z’iterambere z’u Rwanda, by’umwihariko mu kongerera ubushobozi urubyiruko no kuzamura gahunda z’ubukungu zisubiza ibibazo by’ihindagurika ry’ikirere. Yagaragaje kandi ko u Rwanda rwiteguye kwakira ibikorwa bishya by’ubufatanye, birimo n’ishoramari mu nganda n’ikoranabuhanga, byitezweho gufasha igihugu kugera ku ntego z’icyerekezo 2050.
Abasesenguzi mu by’ububanyi n’amahanga bavuga ko uyu mubano ukomeje gufata indi ntera, nyuma y’igihe kirekire habonekamo agatotsi hagati yibihugu byombi. Kuri ubu, u Rwanda n’u Bufaransa byombi biri mu nzira yo kubaka umubano ushingiye ku kubahana no gusaranganya ubumenyi, mu buryo bushobora gufasha abaturage b’ibihugu byombi kubona inyungu rusange.
Iyi nama ije mu gihe u Rwanda rwitegura kwakira Inama ya 46 y’Abaminisitiri ba Francophonie (CMF46) mu Ugushyingo 2025, igikorwa giteganyijwe kuzongera gusigasira umubano n’imikoranire hagati y’u Rwanda n’ibihugu bikoresha Igifaransa, harimo n’u Bufaransa.
