Kigali – uyu munsi Tariki ya 18 Ukwakira 2025 – U Rwanda rwatangaje ko rugiye kwakira ku nshuro ya kabiri inama y’abakomando b’ingabo za Afurika (Land Forces Commanders Symposium – LFCS), igamije kurebera hamwe uko ingabo zishobora kurushaho kugira uruhare mu kwimakaza amahoro n’umutekano ku mugabane. Iyo nama izabera i Kigali kuva ku itariki ya 21 kugeza ku ya 22 Ukwakira 2025, ikazaba ifite insanganyamatsiko igira iti: “Gukoresha ubushobozi bw’ingabo mu gushyira mu bikorwa neza ingamba z’amahoro n’umutekano.”
U Rwanda, rwamaze kubaka izina mu kubungabunga amahoro ku isi hose binyuze mu ngabo zarwo zoherezwa mu butumwa bwa Loni, rugaragaza ko iyi nama ari indi ntambwe mu gushyira imbere imikoranire ya gisirikare ishingiye ku bwizerane, ubufatanye no guhanga ibisubizo birambye by’umutekano uhamye.
Mu itangazo ryasohowe n’Ingabo z’u Rwanda (RDF) rigashyirwa hanze , rivuga ko iyi nama izaba urubuga rwo guhuza abayobozi b’ingabo baturutse mu bihugu bitandukanye bya Afurika n’ahandi ku isi, hagamijwe gusangira ubunararibonye mu miyoborere, mu kubaka amahoro n’iterambere ry’umutekano w’abaturage batuye Afurika ndetse nisi muri rusange.
U Rwanda ruzakira iyi nama mu gihe rukomeje kugaragaza icyizere n’ubunyamwuga mu bikorwa by’ubutabazi no kubungabunga amahoro hirya no hino ku isi. Ibi bigaragaza ko igihugu cyabaye icyitegererezo mu gukoresha ubushobozi bw’ingabo mu nyungu z’abaturage no mu kurinda inyungu z’umugabane wa Afurika wose muri rusange ndetse no kwisi.
Abazitabira iyi nama bazaganira ku ngingo zifitanye isano n’imiyoborere ya gisirikare, guhangana n’ibibazo by’umutekano byiyongera ku mugabane, ndetse no kunoza uburyo bwo gusangira amakuru n’ubumenyi hagati y’ingabo z’ibihugu bya Afurika.
Iyi nama yateguwe n’Ingabo z’u Rwanda ni ikimenyetso cy’uko Kigali ikomeje kuba ihuriro ry’ibiganiro mpuzamahanga bigamije guha umutekano n’amahoro umwanya wa mbere mu iterambere rya Afurika byumwihariko u Rwanda.
