Kuri uyu wa Gatanu, tariki ya 12 Nzeri 2025, ahazwi nka Saint Paul habereye amahugurwa yateguwe n’umushinga Profemme Twese Hamwe, ugamije gufasha abaturage kongerera agaciro ibikomoka ku buhinzi n’ubworozi. Uyu mushinga wibanda cyane ku gufasha abagore, urubyiruko ndetse n’abafite ubumuga kugira ngo babashe kwiteza imbere mu buryo burambye.
Amahugurwa yatangiye abanyamuryango bishimira uburyo gahunda ibafasha mu bikorwa byabo bya buri munsi, banatanga ubuhamya ku byo bakora n’uko biteze inyungu muri iyi gahunda.
Aya mahugurwa yatangijwe na Angelique, aho yasobanuriye abitabiriye ko gahunda yari izwi nka VADE ariyo isigaye yitwa VIBE (umushinga ukorera muri Profemmes). Yagaragaje ko iyi gahunda igamije guteza imbere iterambere ry’abanyamuryango biciye mu kongerera agaciro umusaruro w’ubuhinzi n’ubworozi, kubaka ubushobozi, no guteza imbere ubucuruzi buciriritse n’ubutunganyirizwa bw’ibikomoka ku buhinzi.
Angelique UMULISA kandi yibukije ko ejo hashize yari yatumiwe kuri Radiyo Rwanda (RBA), aho yasobanuriye Abanyarwanda gahunda ya VIBE n’inyungu zayo, yerekana ko ari amahirwe akomeye ku baturage bafite gahunda zo kwihangira imirimo.
Ikindi kandi aya mahugurwa arakomeje, kuko uyumunsi hahuye ba rwiyemezamirimo bo mukarere ka Nyarugenge hakaba hakurikiyeho ejo abo mutundi turere two mumugi wa Kigali.
Abitabiriye bahawe amasomo yerekeranye n’uburyo imisoro ikatwa n’Ikigo cy’Igihugu cy’Imisoro n’Amahoro (RRA). Ayo masomo yari agamije gufasha abaturage gusobanukirwa neza uburyo imisoro ibarwa ku mushahara, n’uruhare ifite mu iterambere ry’igihugu.
Nk’uko byasobanuwe mu nyigisho, imisoro ku mushahara ibarwa mu byiciro bikurikira:
- 0% ku mushahara uri munsi ya 60,000 Frw ku kwezi.
- 10% ku mushahara uri hagati ya 60,001 na 100,000 Frw ku kwezi.
- 20% ku mushahara uri hagati ya 100,001 na 200,000 Frw ku kwezi.
- 30% ku mushahara urengeje 200,000 Frw ku kwezi.
- Hakiyongeraho kandi 15% ku musaruro w’abanyabukorikori n’abacuruzi bato (nyakabyizi).
Abitabiriye aya mahugurwa basobanuriwe ko imisoro atari igihombo ku muturage, ahubwo ari uburyo bwo gutanga umusanzu mu kubaka igihugu, kuko amafaranga yinjira afasha Leta mu bikorwa remezo, uburezi, ubuzima, n’izindi gahunda z’iterambere.
Bamwe mu banyamuryango bagaragaje ko kumenya neza ibyiciro by’imisoro bizabafasha kumva neza amafaranga bakatwa ku mushahara, bikabafasha no kunoza igenamigambi ry’imibereho yabo ya buri munsi.
Abitabiriye amahugurwa basabye ko aya mahirwe yakomeza gusakara mu gihugu hose, cyane cyane mu rubyiruko n’abagore, kugira ngo bigire uruhare rukomeye mu guhindura imibereho n’iterambere ry’imiryango yabo.
