Kigali – Kuri uyu wa kabiri nimugoroba, Minisitiri wa Leta muri Minisiteri y’Ububanyi n’Amahanga, Gen (Rtd) James Kabarebe, yakiriye Ambasaderi w’u Bufaransa mu Rwanda, Nyakubahwa Aurélie Royet-Gounin, mu ruzinduko rwo gushimangira umubano rwabereye ku cyicaro cya Minisiteri abereye umuyobozi.
Ibi biganiro byabaye mu rwego rwo gukomeza gushimangira ubufatanye n’ubuhahirane hagati ya Leta y’u Rwanda n’u Bufaransa, ndetse no kuganira ku mishinga y’iterambere ibihugu byombi bifatanyamo, Mu biganiro byabo, bombi bagarutse ku mubano ukomeje gutera imbere hagati y’u Rwanda n’u Bufaransa, by’umwihariko mu nzego z’uburezi, ikoranabuhanga, ubucuruzi, n’umutekano.
Minisitiri Gen (Rtd) Kabarebe yashimye uruhare rw’u Bufaransa mu guteza imbere ubufatanye n’u Rwanda, avuga ko u Rwanda rwiteguye gukomeza gukorana n’u Bufaransa mu buryo bwagutse, bugamije guteza imbere inyungu z’abaturage b’ibihugu byombi.
Ambasaderi Aurélie Royet-Gounin na we yashimangiye ko igihugu cye gishimishwa n’umubano mwiza gifitanye n’u Rwanda, kandi ko gifite ubushake bwo gukomeza gufatanya mu bikorwa binyuranye bigamije iterambere rirambye.
Ibi biganiro bikurikiye ibindi bikorwa byinshi bigaragaza ubusugire n’iterambere ry’umubano w’ibihugu byombi, birimo umubano mu by’uburezi, ibikorwa bya Francophonie, ndetse n’imishinga y’ubufatanye mu bya gisirikare n’ikoranabuhanga.
