Kabamba, Uganda – Mu muhango wagaragaje isura nshya y’ingabo za Uganda (UPDF), Perezida Yoweri Kaguta Museveni yahaye amapeti abasirikare bashya barangije amasomo y’ubusirikare mu ishuri rya Kabamba, abibutsa ko kuba umusirikare atari ukumenya kurasa gusa, ahubwo ari ukuba umuntu wubaha indangagaciro n’amahame y’igihugu.
Perezida Museveni yashimiye aba basirikare bashya kuba baratsinze urugendo rutoroshye rwo guhugurwa, anashimira Umugaba Mukuru w’Ingabo (CDF) General Muhoozi Kainerugaba n’abatoza ku kazi keza bakoze mu kubategura. Yavuze ko igihugu gikeneye ingabo zifite intego, zifite indangagaciro, kandi zizi impamvu zibaho.
Mu ijambo rye ryagaragaragamo impanuro n’ubutumwa bw’ubushishozi, Museveni yasigiye aba ofisiye amagambo ane y’ingenzi yise “urufunguzo rw’umusirikare nyawe”:
- Ubuzima (Afya): “Mwirinde, mwite ku mibiri yanyu n’ubuzima bwanyu, kuko umusirikare urwaye ntashobora kurinda igihugu.”
- Imyitwarire (Nidhamu): “Nta gisirikare gishobora kubaho kidafite ikinyabupfura. Nidhamu ni yo ituma musenyera umugozi umwe.”
- Gukunda igihugu (Uzalendo), (Patriotism): “Ntimuze muri ingabo zo gukorera inyungu z’amahanga. Mujye muzirikana ko muri abasirikare ba Uganda, mwubakiye ku mahame y’ubutwari, ubumwe bwa Afurika, impinduka mu bukungu n’ubwisanzure bwa rubanda.”
- Ubumenyi (Utalaamu): “Mwige, mugire ubumenyi mu ntambara z’iki gihe. Umusirikare udasobanukiwe ikoranabuhanga ntashobora guhangana n’intambara z’ubu.”
Museveni yavuze ko intego ye atari ugutanga amapeti gusa, ahubwo ari ugusiga ubutumwa bw’ubuzima buzabafasha kuba abarinzi b’igihugu bafite icyerekezo.
Uyu muhango wabereye mu kigo cya Kabamba, ukaba wagaragaje icyizere cy’igihugu ku basirikare bashya bazarinda umutekano wa Uganda mu bihe bigoye n’iby’iterambere rikataje.
