Jean Pierre Kagabo, umwe mu banyamakuru bakurikiranwaga cyane muri Rwanda Broadcasting Agency (RBA), yasoje urugendo rwe rw’imyaka 22 muri iki kigo nyuma y’akazi gakomeye kagaragayemo ubwitange, ubunyamwuga ndetse n’ubutabera bw’amakuru yo kuvugira baturage.
Kagabo yatangiye urugendo rwe mu itangazamakuru mu mwaka wa 2003, agitangira kwiga muri kaminuza. Yatangiriye kuri radiyo z’abaturage, aho yatangiriye kuri RC Rubavu, imwe muri radiyo zamenyekanye mu gutangaza amakuru ava mu baturage kandi agera ku baturage. Muri iyo radiyo yahakoreye imyaka itandatu, yerekana ubuhanga mu gutara inkuru zicukumbuye . Mu mwaka wa 2009, Rwanda Broadcasting Agency yamukuye muri izo radiyo imuzamura mu rwego rw’igihugu, imushinga uturere twa Nyaruguru na Nyamagabe nk’umuhagararizi wungirije (agent). Aha yahakoreye kugeza mu 2013, akomeza kurangwa no kwegera abaturage, kumenya ibibazo byabo.
Nyuma yo kwitwara neza mu kazi, mu mwaka wa 2013 nibwo yahawe “Title” itari yarigeze ihabwa umuntu numwe: Senior Reporter. Izo nshingano nti zari zarigeze zihabwa undi muntu mu RBA mbere ye, ikaba yaragaragazaga icyizere ubuyobozi bwari bufitiye ubunyamwuga bwe, ubunararibonye n’indangagaciro mu kazi.
Kuva icyo gihe kugeza n’ubu yasoje, Kagabo yakomeje kuba umwe mu batangazamakuru bafatwa nk’indashyikirwa mu gutara amakuru yegera abaturage, kuba ijwi ry’abo , no kugaragaza ubunyamwuga mu isesengura. none kuwa 5/11/2025 nibwo humvikanye mubinyamakuru amagambo ye ari gusezera, mwisezera rye yatangaje ko agiye gukora mukigo gishinzwe iterambere ry’icyaro nkuko ariyo masomo yari yarakurikiye mukwiga kwe.
