Kuri Sitade ya Nyanza, habereye igikorwa cy’ingenzi ku gihugu ubwo hatangizwaga ku mugaragaro gahunda yo kwemeza imyirondoro no gufotorwa y’abaturage, mu rwego rwo gutegura itangwa rya Indangamuntu nshya y’ikoranabuhanga, izahabwa buri Munyarwanda.
Ni gahunda izahindura uburyo igihugu gicunga amakuru y’abaturage, aho buri muntu azahabwa Indangamuntu yifitemo ikoranabuhanga ryisumbuye kuryari risanzwe, ishobora gusomwa ku buryo bwa “chip” cyangwa “QR code”, kandi izakoreshwa mu guhabwa serivisi zitandukanye mu buryo bworoshye, bwihuse kandi butekanye. mu muhango wabereye i Nyanza, watangijwe ku rwego rw’igihugu, abashinzwe gushyira mu bikorwa uyu mushinga bavuze ko intego nyamukuru ari ugushyira u Rwanda mu murongo w’ibihugu bigezweho mu gukoresha ikoranabuhanga mu gucunga imyirondoro y’abaturage.
Umuyobozi w’Ikigo cy’Igihugu gishinzwe Indangamuntu (NIDA) yavuze ko iyi ndangamuntu izaba ifite ubushobozi bwo guhuza amakuru yose y’umuturage mu buryo bwikoranabuhanga, harimo ay’ubuzima, uburezi, ubwisungane mu kwivuza, imisoro ndetse n’imyirondoro y’ubukungu, byose bikazajya bigaragara ku ndangamuntu imwe.
“Nta muturage uzongera kugenda afite impapuro nyinshi cyangwa atazi aho amakuru ye ari. Indangamuntu nshya izaba ari umuyoboro uhuza buri wese n’igihugu cye mu buryo bwizewe kandi bw’ikoranabuhanga, niko yavuze umwe mu bayobozi ba NIDA. abaturage bo mu Karere ka Nyanza bishimiye kuba iki gikorwa cyatangiriye iwabo, bavuga ko bigaragaza icyizere Leta ifitiye abaturage bayo ndetse n’ubushake bwo kubagezaho serivisi zinoze.
Umwe muri bo yagize ati:“Iyi ndangamuntu nshya izadufasha kubona serivisi z’ubuvuzi, imisoro n’amabanki mu buryo bworoshye. Ni intambwe ikomeye igihugu cyacu gitangiye.” Indangamuntu nshya izaba ifite umutekano urenze ku y’ubu, kuko izifashisha ikoranabuhanga rya biometric (ryerekana isura, igikumwe n’amajwi), bikazagabanya ubujura bw’imyirondoro cyangwa ikoreshwa nabi ry’amakuru.
Iki gikorwa giteganyijwe gukomereza mu turere twose tw’igihugu mu mezi ari imbere, aho buri muturage azahabwa igihe cyo kwemeza imyirondoro ye no gufotorwa, mbere yo guhabwa Indangamuntu nshya. U Rwanda rukomeje kwinjira mu gihe gishya cy’ubumenyi n’ikoranabuhanga, aho umuturage wese azaba afite indangamuntu ivuga byinshi kurusha amazina ye — indangamuntu y’ubumenyi, ikoranabuhanga n’iterambere.
Turayitegereje
Hy