Impunzi z’Abarundi ziri mu nkambi za Nduta na Nyarugusu muri Tanzania zigaragaza impungenge ko zishobora gusubizwa iwabo ku gahato, mu gihe bamwe muri zo bavuga ko aho zasize mu Burundi hakiri ibibazo by’umutekano n’imibereho. Izi mpungenge zigaragarira cyane mu bikorwa bimaze iminsi bikorwa n’ubuyobozi bw’inkambi, aho amashuri abana bigagamo yafunzwe, kimwe n’insengero bajyaga gusengeramo.
Abaturage bo muri izi nkambi bavuga ko babwiwe ko abana babo bagomba gusubira mu Burundi, ngo kuko ari ho amashuri agitangira ku girango batazasanga ngo barabasize. Ibi bituma bumva ko bari gukorerwa igitutu cyo gusubira mu gihugu cyabo, mu gihe bo ubwabo batarabona ko ibintu byose bihagaze neza ku buryo babaho mu mutekano n’umudendezo.
bavuga ko gufunga insengero byabambuye uburenganzira bwo gusenga no guhumurizwa mu gihe bari mu bibazo. Abenshi bagaragaza ko kuba barafashwaga n’ayo mashuri n’izo nsengero byabafashaga kurushaho kumva ko bari mu buzima busanzwe nubwo bari mu buhungiro.
Mu gihe Tanzania igaragaza ko ifite gahunda yo kugabanya impunzi no gusubiza buri wese mu gihugu cye, bamwe mu barengera uburenganzira bwa muntu basaba ko hakomeza kubahirizwa amahame , aho umuntu wese yagombye gufata icyemezo cyo gutaha ku bushake bwe, adashyizweho igitutu.
Impunzi z’Abarundi zisaba ko ijwi ryabo ryumvwa, kandi hakarebwa uburyo abana bakomeza kwiga no kubona uburenganzira bwo gusenga mu gihe hagishakishwa igisubizo kirambye ku kibazo cyabo.
