Kuri uyu wa Kabiri, tariki ya 16 Nzeri 2025, ku cyicaro cy’Urukiko rw’Amatora (NEC) habereye inama ikomeye yahuje abayobozi b’inzego eshatu z’ingenzi mu miyoborere no mu ikoranabuhanga mu Rwanda, arizo Komisiyo y’Igihugu y’Amatora (NEC), Ikigo cy’Igihugu gishinzwe Indangamuntu (NIDA) n’Ikigo gishinzwe Ikoranabuhanga mu Itumanaho no mu Isakazabumenyi (RISA). Iyi nama yari igamije kurebera hamwe uburyo bwo gufatanya mu gukosora ilisiti y’itora no kuyihuza n’imyiteguro yo gushyira mu bikorwa E-ndangamuntu nshya.
Umuyobozi Mukuru wa NEC yasobanuye ko gukosora ilisiti y’itora ari imwe mu nkingi zikomeye z’amatora anyuze mu mucyo. Yagaragaje ko iyo lisiti ikosowe neza, igahuza n’amakuru afatika y’abaturage, bitanga icyizere ku matora ko uburenganzira bwe buzubahirizwa nta kosa ribayeho, Yagize ati: “Ubufatanye hagati y’inzego zacu ni ingenzi kuko butuma tugera ku ntsinzi idafite amakemwa mu gutegura amatora yizewe kandi aciye mu mucyo.”
Ku ruhande rwa NIDA, hashimangiwe ko E-ndangamuntu nshya itazaba ari inyandiko isanzwe yo kwiyandikishaho, ahubwo izaba igikoresho cy’ikoranabuhanga gifasha mu gucunga neza amakuru y’abaturage. Bizatuma amakuru ajyanye n’abatora abikwa mu buryo bwizewe, hagabanywe amakosa yo kwitiranya abantu cyangwa gusanga hari abagaragara ku ilisiti batemerewe gutora. Umuyobozi wa NIDA yagaragaje ko E-ndangamuntu izafasha cyane mu kongera imbaraga mu mutekano w’amatora, kuko izaba ishingiye ku ikoranabuhanga rigezweho.
Na none, RISA yijeje ko izatanga ibisubizo by’ikoranabuhanga bitanga umutekano usesuye ku makuru azakoreshwa mu matora. By’umwihariko, hitezwe uburyo bwo guhuza ibisabwa n’amatora n’ububiko bw’amakuru y’igihugu, bigatuma amakuru y’umuturage yemererwa gukoreshwa mu buryo bwizewe kandi bunoze. Umuyobozi wa RISA yagize ati: “Umutekano w’amakuru niwo nkingi y’ibikorwa byose bya E-ndangamuntu. Tugomba kubaka icyizere mu baturage ko amakuru yabo atazahungabanywa mu gihe cy’amatora.”
Iyi nama ikomeye ije mu gihe u Rwanda rukomeje gutegura uburyo bushya bwo guhuza ikoranabuhanga n’inzira za demokarasi. Aho gukoresha impapuro cyangwa inyandiko zisanzwe, ubuyobozi burifuza kwimakaza uburyo bushya bushingiye ku ikoranabuhanga buzatuma buri mututurage abasha gutora mu buryo bworoshye kandi bwizewe.
Abasesenguzi bemeza ko iki gikorwa gishobora kuba intambwe ikomeye mu kwimakaza imiyoborere ishingiye ku ikoranabuhanga, ariko kandi bakibaza niba abaturage bose bazahita babasha kugera kuri serivisi za E-ndangamuntu ku gihe, by’umwihariko abaturiye mu bice by’icyaro.
