Ku bibuga bya Tennis bya IPRC Kigali, hasojwe icyumweru cya mbere cy’irushanwa rya “Rwanda Open M25”, ryahuje ibyamamare bitandukanye mu miyoborere, siporo n’ubucuruzi by’u Rwanda.
Abarimo Umunyamabanga wa Leta muri Minisiteri ya Siporo, Rwego Ngarambe, Umuyobozi Mukuru wa TG Automobile Technology, Wang Yu, Perezida w’Ishyirahamwe ry’Umukino wa Tennis mu Rwanda (RTF), Karenzi Théoneste, ndetse na Visi Perezida w’Agateganyo, Lt Col (Rtd) Fidèle Kamanzi, bari mu bafana baje gushyigikira umukino wa nyuma w’icyumweru cya mbere cy’iri rushanwa rikomeje gufata intera mu gihugu.
Umukino nyir’izina wahuje Umufaransa Corentin Denolly na Umudage Maik Steiner mu gace ka nyuma (final) k’abakina ari umwe. Denolly yatangiye neza, atsinda iseti ya mbere ku manota 6-0, agaragaza ubuhanga mu gucunga imipira n’umuvuduko. Ariko Steiner ntiyacitse intege — yaje kwisubiza icyizere atsinda iseti ya kabiri ku manota 7-5, bituma amahirwe yombi aba angana.
Iseti ya gatatu, ari na yo y’ingenzi arinayo kamarampaka, yabaye iy’amateka, kuko ari yo yagombaga gutanga umukinnyi wegukana icyumweru cya mbere cy’iri rushanwa ryitabirwa n’abakinnyi bakomeye batandukanye ku rwego mpuzamahanga.
Uretse umukino ubwawo, abitabiriye bashimye uburyo iri rushanwa riteguwe, rifasha kuzamura impano nshya mu mukino wa Tennis no guteza imbere ubukerarugendo bwa siporo mu Rwanda. Rwego Ngarambe yashimye uruhare rwa RTF mu guteza imbere uyu mukino, avuga ko “Tennis iri mu mikino ifite ubushobozi bwo kureshya urubyiruko no guteza imbere imidagaduro y’u Rwanda ku rwego mpuzamahanga.”
Iri rushanwa rya Rwanda Open M25 riri gukinirwa mu byiciro bibiri byisukiranya mu byumweru bibiri bikurikirana, aho icyumweru cya kabiri kizatangira mu minsi mike iri imbere.
Mu buryo bugaragaza imbaraga u Rwanda rushyira mu iterambere rya siporo, iri rushanwa rikomeje kuba urubuga rwo guhuza abashoramari, abayobozi n’abafana ba Tennis, bigaragaza Kigali nk’icyicaro gishya cya siporo y’umwuga muri Afurika y’Iburasirazuba
