Ikipe ya Chelsea FC yamaze gutangaza ku mugaragaro ko Liam Rosenior umugabo wimyaka 41 ari we mutoza mushya mukuru w’iyi kipe, mu rwego rwo gukomeza kubaka umushinga mushya ugamije gusubiza iyi kipe ku rwego rwo hejuru mu marushanwa yo mu Bwongereza n’i Burayi.
Uyu mutoza mushya azungirizwa n’itsinda ry’abatoza rimufasha rigizwe na Justin Walker, Kalifa Cissé na Ben Warner, bose bafite ubunararibonye mu bijyanye n’imyitozo, imitegurire y’abakinnyi n’imikorere ya tekiniki y’ikipe.
Liam Rosenior ni umwongereza w’umutoza wa ruhago wabaye n’umukinnyi wabigize umwuga mbere yo kwinjira mu mwuga wo gutoza. Azwi cyane mu Bwongereza kubera urugendo rwe nk’umukinnyi wakinnye mu makipe atandukanye, ndetse n’ukuntu yinjiye mu gutoza akiri muto, ibintu byatumye yigarurira icyizere cy’abakunzi ba ruhago .
Nk’umukinnyi, Liam Rosenior yakinnye mu makipe atandukanye akomeye yo mu Bwongereza arimo Fulham, Reading, Hull City, Brighton & Hove Albion na Derby County. Yakinaga cyane ku mwanya wa myugariro wo ku ruhande, yaba iburyo cyangwa ibumoso, akaba yararanzwe n’ubunararibonye mu bwugarizi n’ubuyobozi mu kibuga, ndetse akaba yarabaye kapiteni muramwe mu makipe yakiniye.
Nyuma yo guhagarika gukina, Rosenior yahise yinjira mu mwuga wo gutoza, aho yagaragaje ubushobozi bwo gutoza bushingiye kuri tactique igezweho, kwita ku iterambere ry’abakinnyi bato no gushyira imbere ruhago ishingiye kuguhererekana (passes) umupira no gufata ibyemezo byihuse mu kibuga. Yabaye umutoza wungirije ndetse n’umutoza mukuru mu makipe atandukanye yo mu Bwongereza, bituma azamuka mu izina nk’umutoza ufite icyerekezo cy’ejo hazaza.
Kuri ubu, Liam Rosenior avugwa cyane kubera amahirwe agenda ahabwa mu makipe akomeye, aho afatwa nk’umutoza uzana icyerekezo gishya, ufite imbaraga mu myitozo n’ubushobozi bwo kubaka umushinga w’igihe kirekire. Mu ncamake, ni umutoza ukiri muto, ufite ejo hazaza heza mu mwuga wo gutoza, witezweho gutanga umusanzu ukomeye mu iterambere mumakipe atoza.
Ubuyobozi bwa Chelsea bwatangaje ko uyu mugabo basinyanye amasezerano azageza 2032 Ubuyobozi kandi bwatangaje ko bwizeye ubu bufatanye buzazana impinduka nziza, bukongera imbaraga mu mikinire, mu mitegurire no mu miyoborere y’ikipe. Liam Rosenior azwiho guha amahirwe abakinnyi bato, gukina ruhago ishingiye ku kugenzura umupira no gushyira igitutu ku mukeba, ibintu byitezweho gufasha Chelsea mu gihe kiri imbere ikaba yahatana ndetse ikaba yagera no kubikombe.
Abakunzi ba Chelsea barategereje kureba uko uyu mushinga mushya uzashyirwa mu bikorwa, n’uko iyi kipe izitwara mu mikino iri imbere, mu rugendo rwo gusubirana icyubahiro n’umwanya wayo mu makipe akomeye ku mugabane w’u Burayi dore ko ariyo inafite igikombe ccy’isi ccyama club.
