Ku wa 22 Nzeri 2025, Ishyaka riri kubutegetsi rya Chama Cha Mapinduzi (CCM) ryakoze mitingi ikomeye y’ubukangurambaga mu rwego rw’amatora iyo mitingi yabereye muri Manispala ya Songea, mu Ntara ya Ruvuma.
Iyo mitingi yitabiriwe n’imbaga y’abaturage ibihumbi hamwe n’abayobozi batandukanye ba CCM ndetse numuhanzi Diamond Platnum uzwi cyane nkicyamamare mumugabane wa Africa ndetse no ku isi hose, aho abayobozi bakoresheje ayo mahirwe kugaragaza gahunda n’imigabo n’imigambi y’ishyaka mu rwego rw’amatora ari imbere. Mu butumwa bwabo, bashimangiye akamaro k’ubumwe bw’igihugu, iterambere ry’ubukungu n’imibereho myiza, ndetse no kunoza serivisi shingiro zigezwa ku baturage.
Abayobozi b’ishyaka basabye abaturage gukomeza kwizera CCM bashingiye ku mateka maremare yaryo yo kuyobora igihugu no gushyira mu bikorwa imishinga minini y’iterambere. Banakoresheje iyo nama kugira ngo bagaragarize abaturage ibyo bamaze kugeraho mu nzego zirimo uburezi, ubuzima, ubuhinzi, imihanda n’ingufu, kandi basezeranya kongera umuvuduko mu ishyirwa mu bikorwa ryayo nibaramuka bongerewe icyizere n’abaturage.
Mitingi yabereye i Songea yagaragajwe n’ubwitabire bwinshi bwuzuyemo amarangamutima, igasusurutswa n’indirimbo, umuziki ndetse n’ibirango by’ishyaka birimo amabendera n’imyenda y’icyatsi n’umuhondo – ibirango bya CCM. Abaturage bagaragaje ubushake bwo kumva ubutumwa bw’abayobozi no kugaragaza ubufatanye n’ishyaka.
Ibi bikorwa by’i Songea bigaragaza urukurikirane rw’ubukangurambaga bwa CCM hirya no hino mu gihugu, bigamije kwegera abaturage mu buryo bwo kubagezaho imigabo n’imigambi y’ishyaka no gushimangira umubano hagati yaryo n’abaturage mu gihe cy’amatora.
