Uyu munsi mu Karere ka Musanze, Umuyobozi w’Ishuri rya Gisirikare rya RDF ryigisha Ofisiye bakuru riri Nyakinama, Brig Gen Andrew Nyamvumba, yafunguye ku mugaragaro inama yo kwemeza no gutangiza amasomo mashya ajyanye n’ubuyobozi ku rwego rwo hejuru yenda kwinjizwa mu nteganyanyigisho y’iri shuri vuba bidatinze.
Iyi nama ifite intego yo gushyigikira gahunda yo kuzamura ireme n’imikorere y’Ishuri rya Gisirikare rya RDF, kugira ngo rirusheho kuba ikigo cy’icyitegererezo mu bijyanye n’uburezi bwa gisirikare no kuyobora bigezweho.
Abitabiriye iyi nama barimo abahagarariye Minisiteri y’Ingabo, Minisiteri y’Ububanyi n’Amahanga, inzego z’umutekano, ndetse n’abahagarariye Kaminuza zitandukanye zirimo iyu Rwanda, Makerere (Uganda), American University of Malta (AUM) na Kaminuza ya Euclid .
Aba bafatanyabikorwa bazatanga ubufasha mu gutegura no kunoza gahunda nshya y’amasomo, hagamijwe guhuza ubumenyi bwa gisirikare n’ubumenyi rusange mu by’ubuyobozi, bikazafasha iri shuri gukomeza kuba ku isonga mu burezi bwa gisirikare mu karere.
Iyi gahunda nshya izatuma Ishuri rya Gisirikare rya RDF rya Nyakinama rirusha kuba ikigo cy’amahugurwa n’ubushakashatsi mpuzamahanga, rikazajya ritanga amasomo agezweho ahuza ibya gisirikare, politiki, ubukungu n’ubuyobozi .
