Amahugurwa yiswe “Battle Group Commanders’ Training of Trainers in Peace Support Operations” yatangiye kuri uyu wa Mbere muri Rwanda Peace Academy iherereye mu Karere ka Musanze. Aya mahugurwa yateguwe ku bufatanye bwa Rwanda Peace Academy, Eastern African Standby Force (EASF) Secretariat hamwe na African Peace and Security Architecture (APSA), kandi azamara igihe cy’ibyumweru bibiri, uhereye ku itariki ya 8 kugeza ku ya 19 Nzeri 2025.
Amahugurwa yitabiriwe n’abasirikare bakuru baturutse mu bihugu bitandatu bigize EASF ari byo: Burundi, Djibouti, Ethiopia, Kenya, Rwanda na Uganda, ndetse n’intumwa ziturutse ku cyicaro gikuru cya EASF.
Uwafunguye ku mugaragaro aya mahugurwa ni Brig Gen Ronald Rwivanga, Umuvugizi w’Ingabo z’u Rwanda, wabikoze ahagarariye Umugaba Mukuru w’Ingabo z’u Rwanda (RDF Chief of Defence Staff).
Mu ijambo rye, Brig Gen Ronald Rwivanga yashimiye cyane EASF ku bw’uruhare rwayo rwo kubaka ubushobozi bw’imbere mu rwego rwo kubungabunga amahoro n’umutekano mu karere. Yanashimye kandi Rwanda Peace Academy ku bwo kwakira aya mahugurwa akomeye ndetse n’umusanzu ikomeje gutanga mu gutegura amasomo afasha abakomanda n’abasirikare kongera ubushobozi mu bikorwa byo kubungabunga amahoro mu karere no hanze yako.
Brig Gen Ronald Rwivanga yagaragaje akamaro k’aya mahugurwa agira ati: “Kwagura umubare w’abasirikare bafite ubumenyi buhagije ni ngombwa kugira ngo habeho urwego rukomeye rw’abatoza bashobora gusangiza abandi ubumenyi ku nzego zose z’ingabo zacu.” Yongeyeho ati: “Kubaka ubushobozi bwo kuba abayobozi n’abarezi icyarimwe bizatuma ubuziranenge mu myitozo bugera henshi, ndetse no mu bice by’ibikorwa bya kure cyane.”
Yibukije kandi abitabiriye ko aya mahugurwa atari uguteza imbere umuntu ku giti cye gusa, ahubwo ari no gushimangira imbaraga z’inzego zose. Yashimangiye ko batari kwitegurira gusa kuyobora, ahubwo banitegurira kwigisha, guhugura no gusangiza abandi ubumenyi n’ubunararibonye bizafasha kubaka ingabo zikomeye, z’umwuga kandi zihora ziteguye. Yabasabye kwitabira amasomo bafite umutima ufunguye, kwitanga, n’intego imwe yo kubaka ubufatanye n’umutekano urambye.Bwana Kenneth Goren Albert, Umunyamabanga Ushinzwe Guhuza no Gukurikiranira hafi Inama Mpuzamahanga, yashimiye abarimu, abitabiriye, EASF ndetse n’ibihugu binyamuryango ku bwo kugira uruhare muri aya mahugurwa y’ingenzi. Yagaragaje uruhare rukomeye
