Kuri uyu wa 19 Nzeri 2025, umutwe wa Alliance Fleuve Congo (AFC/M23) wasohoye itangazo ryiswe “Itangazo ryemewe” ryibanda ku byaha biregwa ubutegetsi bwa Kinshasa ndetse n’ingaruka zabyo ku baturage b’abasivili.
Mu itangazo ryashyizweho umukono n’Umuyobozi Ushinzwe Itumanaho, Irénée Kankuya, AFC/M23 ivuga ko ingabo za Leta ya Congo (FARDC) zakoresheje intwaro zikomeye n’indege z’intambara mu gace ka Bweremana, i Kivuye, hamwe n’utundi duce duherereye hafi aho, zigahitana abaturage b’inzirakarengane. Bavuga ko zagabye ibitero ku itariki ya 19 Nzeri 2025, zifashishije indege ebyiri z’intambara za Sukhoï-25 ndetse n’indege ebyiri zo mu bwoko bwa CH4, bikaba byarateye urupfu n’imiborogo y’abaturage benshi.
AFC/M23 inenga ubutegetsi bwa Kinshasa ko budaha agaciro ibiganiro by’amahoro ndetse bugakomeza kunaniza imbaraga z’abahuza, harimo n’ibiganiro bya Doha byari bigamije gushaka umuti urambye w’amahoro. Mu magambo akakaye, uyu mutwe ushinja ubutegetsi bwa Félix Tshisekedi guhitamo inzira ya gisirikare aho gushaka ibisubizo biciye mu mahoro.
Itangazo rinibutsa ko kuva ku wa 11 Kanama 2025 AFC/M23 yamaze gutangaza ko irwanya imbarutso y’intambara zishobora gutezwa na Kinshasa, ariko ngo ubutumwa bwayo bwirengagijwe.
Uretse kunenga, AFC/M23 isaba amahanga kuticecekera, ahubwo agasaba Kinshasa kureka ibikorwa byo kwibasira abaturage, kandi ikaba ishimangira ko izakomeza kwirwanaho mu rwego rwo kurengera ubuzima n’umutekano by’abatuye Uvira n’utundi duce yigaruriye.
Mu gusoza, AFC/M23 yatangaje ko iramutse ikomeje kugabwaho ibitero, izaba nta yandi mahitamo afite uretse gukomeza “kwirwanaho no kurengera abaturage b’inzirakarengane” kugeza ubwo hazaboneka umuti w’ukuri.
