Guhera kuri uyu wa 18 Kanama kugeza ku wa 21 Kanama 2025, Abanyamuryango bakora ibijyanye n’o kongerera agaciro ibikomoka kubuhinzi n’ubworozi ‘VIBE’ batangiye amahugurwa y’iminsi ine agamije kubongerera ubumenyi ku buziranenge bw’ibiribwa n’imikorere iboneye mu bucuruzi. Aya mahugurwa ari kubera mu Karere ka Musanze, muri Home Inn Hotel, ahahurije inzego zitandukanye z’ubuziranenge n’ubuyobozi bukuriye uru rwego.
Ni amahugurwa yateguwe mu rwego rwo kuzamura no gushyira mu bikorwa gahunda ya “Zamukana Ubuziranenge”, igamije gufasha abikorera kumenya no kubahiriza amabwiriza y’ubuziranenge, kongera umutekano w’ibiribwa, guteza imbere ibicuruzwa bikorerwa mu Rwanda no gukomeza kongera icyizere ku masoko yo mu gihugu no hanze.
Aya mahugurwa yateguwe ku bufatanye n’inzego z’ubuziranenge zirimo RICA (Rwanda Inspectorate, Competition and Consumer Protection Authority), RFDA (Rwanda Food and Drugs Authority), RSB (Rwanda Standards Board) ndetse na PROFEME Twese Hamwe, izwi cyane mu guteza imbere imikoranire y’abagore n’iterambere ry’urubyiruko ariho habarizwamo umushinga witwa VIBE.
Abitabiriye aya mahugurwa bagaragaje ko iyi gahunda izabafasha kunoza imikorere, gutanga serivisi zinoze no kongera ubushobozi mu guhanga udushya twubakiye ku mahame y’ubuziranenge. Biteganyijwe ko bagiye guhugurirwa ku ngingo zitandukanye zirimo isuku n’umutekano mu kazi, uburyo bwo gutunganya ibiribwa mu buryo burambye, gukoresha neza ibipimo ngenderwaho by’ubuziranenge, ndetse n’uburyo bwo gucunga neza ibikorwa by’amasosiyete ku rwego rujyanye n’amabwiriza y’igihugu.
Abatanga amahugurwa bavuga ko aya masomo azafasha mu kurwanya ibicuruzwa bitujuje ubuziranenge no guteza imbere umusaruro w’ubuziranenge buhangana ku isoko mpuzamahanga. Ku ruhande rwa VIBE, iyi ni intambwe ikomeye mu rugendo rwo kubaka abacuruzi n’abakora inganda bafite ubumenyi buhagije kandi bubafasha kongera ubushobozi mu kazi no kurushaho kugira uruhare mu iterambere ry’igihugu.
