Amahugurwa y’iminsi ine ku bijyanye n’ubuziranenge akomeje guhuza abanyamuryango ba VIBE mu Karere ka Musanze, aho kuri uyu wa gatatu tariki 19 Ugushyingo 2025 hakomezaga umunsi wa kabiri w’aya mahugurwa ari kubera muri Home Inn Hotel. Aya mahugurwa ari gutangwa ku bufatanye bw’inzego zitandukanye zirimo Ikigo cy’Igihugu gishinzwe Ubuziranenge (RSB), Ikigo RICA ikigo cy’igihugu gishinzwe ubugenzuzi, guhiganwa mubucuruzi ndetse no kurengera umuguzi, Rwanda FDA ndetse na Profemmes Twese Hamwe, hagamijwe guteza imbere ireme ry’ibiribwa, serivisi n’ibikoresho bishyirwa ku isoko.
Amasomo yo kuri uyu munsi yatangiye saa 08:30 za mu gitondo, aho abanyamuryango ba VIBE batangirijwe amahugurwa numuyobozi mukuru wa Profemme twese hamwe Emma Marie BUGINGO ashishikariza abafatanyabikorwa gukorera hamwe ndetse no gusangira amakuru aho kwikunda, kandi ko bagomba gukora neza bubahiriza ubuziranenge, hakomeje kandi bigishwa na Agnes Bamurange wari uhagarariye Ikigo cy’Igihugu gishinzwe Ubuziranenge — RSB. Mu kiganiro cye, Bamurange yasobanuriye abitabiriye amahugurwa serivisi zitandukanye zitangwa na RSB, zirimo gushyiraho amabwiriza y’ubuziranenge, kwigisha, gupima no kugenzura ibicuruzwa, gutanga ibipimo ngero (standards), ndetse no gutanga ibirango byemeza ubuziranenge ku bicuruzwa biba byujuje ibisabwa.
Mu kiganiro cye, Agnes yatangije ibiganiro agaragaza akamaro k’amabwiriza y’ubuziranenge ku bikorwa by’abacuruzi n’inganda, avuga ko standards zitanga ibizigaragaza mu buryo bw’ibipimo, bikongera icyizere cy’abaguzi, bikarinda ibicuruzwa kuba byateza ibibazo ku miryango no ku buzima rusange bw’ababikoresha. Yibukije ko ubuziranenge bufasha mu kurinda ubuzima bw’abaturage (Food Safety), mu kunoza ireme n’imikorere y’ibicuruzwa (Food Quality) no mu kugera ku rwego rwo gutuma igihugu kibasha kwigenga mu bijyanye n’ibiribwa (Food Security).
Abari mu mahugurwa banerekwa urubuga rushyirwaho serivisi zose za RSB — www.rsb.gov.rw — rubafasha kubona amakuru yose y’ingenzi ajyanye no kwiyandikisha, gusaba ubufasha, gusaba ibirango by’ubuziranenge n’izindi serivisi zose zifasha abashoramari n’inganda.
Mu gusoza ikiganiro, Agnes Bamurange yanagarutse ku bisabwa kugira ngo umunyenganda cyangwa umucuruzi abashe kwinjira muri gahunda ya “Zamukana Ubuziranenge”, irimo kuba ikigo cyiyandikishije muri RDB cyangwa RCA, kugira First User ufasha mu igenzura ry’ibikorwa, kwiyandikisha ku izina ry’ikirango cy’ibicuruzwa (Brand Name), kuba ari SME, kugira abakozi basobanukiwe cyangwa bize bafite ubumenyi, inyubako zujuje ibisabwa n’ibikoresho bihagije.
Nyuma y’ibi biganiro, abanyamuryango babonye umwanya wo kubaza ibibazo no gusobanukirwa neza uko gahunda zose za RSB zikorana n’abikorera mu rwego rwo guteza imbere ubucuruzi bufite ireme mu Rwanda. Lunch yabaye mu masaha ya saa saba, mbere yo gukomeza amasomo y’umunsi.
