Inteko Rusange y’Umutwe w’Abadepite yagaragaje ko yanyuzwe n’ibisubizo byatanzwe na Minisitiri w’Ubutegetsi bw’Igihugu, Habimana Dominique, ku bibazo byagaragaye mu mitangire ya serivisi zitangwa n’inzego z’ibanze, zirimo izijyanye n’irangamimerere, ubutaka n’izikoresha ikoranabuhanga.
Ibi byagarutsweho kuri uyu wa kabiri ubwo Minisitiri Habimana yitabaga Inteko Rusange kugira ngo asobanure ibyagaragajwe mu isuzuma ry’imikorere y’inzego zegerejwe abaturage, hagamijwe kureba uko serivisi zitangwa ku baturage zinozwa kurushaho.
Mu bisobanuro bye, Minisitiri Habimana yavuze ko Minisiteri y’Ubutegetsi bw’Igihugu iri gushyira imbaraga mu kuvugurura serivisi zose zinyuzwa mu nzego z’ibanze, by’umwihariko izirebana n’irangamimerere, ubutaka n’ikoranabuhanga, kugira ngo zirusheho kuba zinoze kandi zihuse.
Minisitiri Habimana yanasobanuye ko serivisi z’irangamimerere (nk’izo kwandikisha Abana, abitabye imana, gushyingirwa cyangwa gutandukana) zigiye kujya zitangwa mu buryo bw’ikoranabuhanga 100%, binyuze kuri sisitemu yihariye izorohereza abaturage kubona ibyangombwa byabo aho bari hose mu gihugu.
Ku bijyanye n’ubutaka, yavuze ko Leta iri gukemura ibibazo byagaragaye mu mikorere y’abakozi bashinzwe ubutaka ku rwego rw’imirenge n’uturere, harimo no kongera ubumenyi bwabo n’inyigisho ku gukoresha ikoranabuhanga mu mitunganyirize y’inyandiko z’ubutaka.
Abadepite bashimye ingamba zafashwe na Minisiteri, bavuga ko gukoresha ikoranabuhanga no gucunga neza abatanga serivisi bizagabanya ibibazo abaturage bahura nabyo, birimo gutinda kubona ibyangombwa, ruswa cyangwa amakosa mu nyandiko.
Inteko Rusange yasabye ko izo ngamba zashyizweho ziherekezwa n’isuzuma rihoraho n’uburyo bwo gukurikirana iyubahirizwa ryazo, kugira ngo ibisubizo byavuzwe bigere ku baturage mu buryo bugaragara.
