Mu cyemezo cyatangaje abantu benshi ku isi, Umuyobozi wa Koreya y’Amajyaruguru, Kim Jong-un, yemeye ko imikino ya Shampiyona y’u Bwongereza Premier League igiye gutambutswa mu gihugu cye ku nshuro ya mbere. Ariko bikagenda biherekejwe n’amabwiriza akomeye yihariye, agaragaza uburyo iki gihugu gikomeje gukaza umutekano w’amakuru n’ibigaragara ku baturage.
Ubuyobozi bwa Kim Jong-un bwatangaje ko imikino itazajya yerekwa rubanda mu buryo bwa “live”, ahubwo izajya ibanza gukorwaho igenzura n’ihindurwa mbere yo gushyirwa kuri televiziyo. Iki cyemezo gifatwa nk’uburyo bwo gukumira ibyagaragara byose bitajyanye n’imigenzo n’imyemerere ndetse namategeko y’icyo gihugu.
Mu yindi mpinduka idasanzwe, umukino umwe uzajya ugabanywa werekanwe mu minota 60 gusa, uvuye ku minota 90 yemewe ku rwego mpuzamahanga. Ni uburyo bushya bwitezweho gutuma abafana bo muri Koreya y’Amajyaruguru babona iby’ingenzi gusa mu mukino, ariko hanakurwamo ibyo igihugu cyabona nk’ibyagisenya.
Muri ayo mabwiriza kandi, inyandiko zose zigaragara kuri sitade zanditse mu Cyongereza zizajya zipfukirwa n’amashusho cyangwa inyandiko ziri mu rurimi rw’icyo gihugu. Abasesenguzi babona ibi nk’uburyo bwo gukumira “ubutumwa bwo hanze” bugaragara mu birango by’amakipe, amatangazo y’abaterankunga cyangwa ibikorwa by’ubucuruzi by’uburengerazurwanda.
Kim Jong-un kandi yategetse ko amashusho agaragaza abakinnyi bakomoka muri Koreya y’Epfo akurwamo burundu. Abarimo Kim Ji-soo ukinira Brentford na Hwang Hee-chan wa Wolves, ntibazagaragara na rimwe ku mashusho y’imikino yerekanwa muri Koreya y’Amajyaruguru. Ubu bwumvikane bwo guca abaturanyi bo mu Majyepfo mu mikino y’imbere mu gihugu ntabwo butangaje, kuko ibihugu byombi bikomeje kugaragaramo umwuka mubi mu mubano.
Si ibyo gusa, amashusho cyangwa ibimenyetso byose bifitanye isano n’uburenganzira bwa LGBTQ+ bizajya bikurwamo mu rwego rwo “gukomeza indangagaciro z’igihugu,” nk’uko itangazo ribivuga. Ibi birimo amabendera, imipira y’abafana, cyangwa ibindi birango bikunze kugaragara muri Premier League.
Ibyemezo bya Koreya y’Amajyaruguru bikomeje kugaragaza uburyo ihitamo gufata umupira w’amaguru nk’igikoresho cyo kwidagadura ariko gikosowe ku rwego rukomeye, ku buryo nta kintu na kimwe cyacenga sisitemu yo kugenzura amakuru. Kugeza ubu, ntibiramenyekana igihe imikino izatangirira gutambutswa, ariko abasesenguzi bavuga ko iyi ari intambwe nshya mu buryo iki gihugu gifata umuco mpuzamahanga n’imikino y’Isi.
