Umuhanzi Richard Nick Ngendahayo yahaye Amafaranga Kadudu nyuma yo kuva kuri stage arira

Umuhanzi w’Umunyarwanda Richard Nick Ngendahayo yongeye kugaragaza umutima ufasha no gushyigikira impano n’aba­hanzi bagenzi be, nyuma y’uko yihanganishije Umunyarwenya Kadudu amuha amafaranga ibihumbi 500 Frw nyuma y’ibyabaye ku rubyiniro byamuteye kurira .

Byari mu gitaramo Kadudu yari yitabiriye mu rwego rwo kumurika impano ye yo gusetsa no gususurutsa abantu. Akigera ku rubyiniro, bamwe mu bari aho batangiye kumutera amagambo amuca intege, bamwe bamubwira ko “Imana yamwimye byose, ibirimo amafaranga n’isura nziza ndetse nimiterere”, amagambo yakomeretse uyu mukobwa bikomeye araturika ararira. Mu gihe yari agerageza gukomeza gahunda, amagambo yo kummuserereza no kumucca intege byatumye Kadudu ahagarika ibirori amanuka ku rubyiniro arira.

Ibi byabaye byamenyekanye ku mbuga nkoranyambaga, bituma abantu batandukanye batangira kugaragaza ko batishimiye uko yahawe isura mbi ndetse n’uburyo abakunzi b’ibitaramo rimwe na rimwe batamenya akamaro ko gushyigikira impano nshya. Mu bababajwe n’iki gikorwa harimo n’umuhanzi Richard Nick Ngendahayo, wihutiye kumwegera ngo amusubize agaciro mu gitaramo.

Richard Nick wari witabiriye igitaramo cya GENZ-COMEDY SHOW yahaye Kadudu ibihumbi 500 Frw nk’ikimenyetso cyo kumushimira no kumwereka ko impano ye ifite agaciro ndetse no kumukiza urubwa, ndetse anamwizeza ko adakwiye gucika intege ngo areke inzira yo gusetsa kubera amagambo aboneka buri gihe mu ruhame. Yamusabye gukomeza gukora cyane, yongeraho ko impano yose ikura gahoro gahoro kandi ikenera abantu bayitera inkunga no kuyishyigikira muri urwo rugendo.

Kadudu, wari ukiri mugahinda k’ibyamubayeho, yashimye igikorwa cy’uyu muhanzi avuga ko cyongeye kumuha icyizere cyo gukomeza gukora cyane no kuzamura impano ye, anashimira abantu bose bamwoherereje ubutumwa bumubwira ko agaciro k’umuntu katangirwa ku rubyiniri ahubwo kari mu buryo yitwara n’inzira ye y’ubuzima.

Leave a Reply

Your email address will not be published. Required fields are marked *