Umukino wa Shampiyona y’icyiciro cya mbere muri Repubulika Iharanira Demokarasi ya Congo (Linafoot), wahuje ikipe ya AS Vita Club na Les Aigles du Congo, wasojwe n’akaduruvayo nyuma y’uko umwe mu bafana ba AS Vita amanutse mu kibuga agasagarira umusifuzi wo ku ruhande. Ni nyuma y’uko umukino warangiye AS Vita itsindiwe mu rugo igitego 1-0, bikarangira bamwe mu bafana bayobewe uko bakira ibyavuye mu mukino.
Uyu mukino wabereye kuri Stade des Martyrs i Kinshasa, wari utegerejwe cyane kuko wahuje amakipe yombi asanzwe afite ishyaka n’amateka akomeye mu mupira w’amaguru muri Congo. Les Aigles du Congo yigaragaje nk’ikipe ifite gahunda n’imyitozo ikomeye, maze ibasha kubona igitego cyayo kimwe rukumbi cyabonetse mu minota ya nyuma y’igice cya kabiri.
Nyuma y’umukino, umwe mu bafana ba AS Vita utishimiye imisifurire, by’umwihariko ku byemezo byafashwe n’umusifuzi wo ku ruhande , yamanutse mu kibuga agerageza kumusagarira ngo amukubite amuteragura imigeri gusa umusifuzi nawe ntiyaviriyemaho yamukubise za my geri na za cou de tourne yitabara. Abashinzwe umutekano bahise batabara byihuse bagerageza kumurinda, ariko uwo mufana yari yamaze kumusatira, ibintu byakuruye urwenya ku mbuga nkoranyambaga, aho bamwe babigarutseho mu buryo bwo gutebya bavuga ko “umusifuzi yitabaye kandi ari umugabo”.
Abakurikiranira hafi ruhago yo muri Congo bavuze ko ibikomeje kubera muri congo ari agatereranzambe cyangwa se icyo twakita akandare, nawe ubyite uko ushaka kuko ni agahumamunwa pe, kuko nambere ibi byari byarabaye ku ikipe yigihugu abafana ntibishimira insinzwi bakora imyigaragambyo bavunagura intebe, bongeyeho kandi ko iki gikorwa kidakwiye na gato mu mupira w’amaguru w’uyu munsi, kuko gisiga isura mbi ku bafana n’amakipe yabo. Ishyirahamwe ry’Umupira w’Amaguru muri Congo (FECOFA) ryatangaje ko rigiye gukurikirana iby’iri sanganya kugira ngo hafatwe ingamba zirinda imyitwarire nk’iyo.
Nubwo AS Vita Club yari yatsinzwe, ubuyobozi bw’iyi kipe bwamaganye icyo gikorwa, busaba abafana kubaha amategeko no kwihangana igihe batishimiye ibyemezo by’abasifuzi. Uyu mukino wasize Les Aigles du Congo izamuka ku rutonde rwa shampiyona, mu gihe AS Vita ikomeje gushaka uko yakwisubiza icyizere mu mikino iri imbere.
