Abahanzi b’ibyamamare bakomoka mu Burundi, Double Jay na Kirikou Akili, bagiye guhurira n’abaririmba b’imbere mu gihugu cy’u Rwanda mu gitaramo cyitezweho kwerekana uburyo umuziki w’Afurika y’Uburasirazuba ukomeje gutera imbere.
Iki gitaramo cyiswe “Harmony Africa Pulse Concert” kizabera muri Kigali Universe ku wa Gatandatu, tariki ya 8 Ugushyingo 2025, kikazaba ari kimwe mu bitaramo bikomeye biteganyijwe gutanga ishusho y’ubufatanye hagati y’abahanzi bo mu bihugu by’ibituranyi.
Ku ruhande rw’u Rwanda, hazitabira amazina akomeye mu muziki nka Fireman, Bushali, Social Mula, na Naason, bose bazwiho ubuhanga n’imibyinire idasanzwe. Ku ruhande rw’u Burundi, Double Jay na Kirikou Akili bazaba bazanye imbaraga z’abaraperi b’iwabo bazwi mu njyana ya Afro-Drill na Bongo Flava.
Abategura iki gitaramo bavuga ko intego ari ukongera guhura kw’abahanzi bo mu karere, bagasangira urubyiniro mu rwego rwo guteza imbere ubuhanzi bushingiye ku muco nyafurika no guhuza abafana mu buryo bwagutse. Umwe mu bagize itsinda ritegura igitaramo yagize ati: “Harmony Africa Pulse Concert si igitaramo gisanzwe, ni urubuga rwo gusangiza urukundo rw’umuziki, guhanga udushya no guha urubyiruko umwanya wo kugaragaza impano.”
Kwinjira muri iki gitaramo bizaba ari 10,000 Frw mu myanya isanzwe na 20,000 Frw mu myanya y’icyubahiro (VIP). Abategura bavuga ko hitezwe umubare munini w’abakunzi b’umuziki bazava mu Rwanda no mu Burundi, bikaba bizatuma Kigali yongera kuba umurwa w’imyidagaduro muri icyo cyumweru.
Mu gihe umuziki w’u Rwanda ukomeje gutera imbere ku rwego mpuzamahanga, ibitaramo nk’ibi bifatwa nk’uburyo bwo kubaka ubufatanye n’abaturanyi, no gushyigikira abahanzi bafite impano ziri kubaka isura nshya y’Afurika mu ruhando rwa muzika.
